واشنگٹن: وزیراعظم شہباز شریف اور چیف آف آرمی اسٹاف فیلڈ مارشل سید عاصم منیر نے وائٹ ہاؤس میں امریکی صدر ڈونلڈ ٹرمپ سے ملاقات کی جس دوران انسداد دہشت گردی اور علاقائی سلامتی سمیت دیگر امور پر تفصیلی گفتگو ہوئی۔

وزیراعظم ہاؤس کی جانب سے جاری اعلامیے کے مطابق ملاقات خوشگوار اور دوستانہ ماحول میں ہوئی۔ اس موقع پر وزیراعظم شہباز شریف نے صدر ٹرمپ کو ’’امن کا علمبردار‘‘ قرار دیتے ہوئے کہا کہ وہ دنیا بھر میں تنازعات کے خاتمے کے لیے خلوص کے ساتھ کوششیں کر رہے ہیں۔

وزیراعظم نے صدر ٹرمپ کی جرات مندانہ اور فیصلہ کن قیادت کو سراہا اور کہا کہ ان کی قائدانہ صلاحیتوں کے باعث پاکستان اور بھارت کے درمیان جنگ بندی ممکن ہوئی، جس سے جنوبی ایشیا میں بڑے بحران کو ٹالنے میں مدد ملی۔

وزیراعظم نے غزہ میں جنگ کے خاتمے اور مسلم دنیا کے رہنماؤں سے ملاقاتوں کے اہتمام پر بھی صدر ٹرمپ کا شکریہ ادا کیا۔

شہباز شریف نے پاکستان اور امریکا کے درمیان رواں سال طے پانے والے ٹیرف معاہدے کا ذکر کرتے ہوئے صدر ٹرمپ کا شکریہ ادا کیا اور کہا کہ پاک امریکا دیرینہ تعلقات ان کی قیادت میں مزید مضبوط ہوں گے، جو دونوں ممالک کے مفاد میں ہیں۔

انہوں نے امریکی کمپنیوں کو زراعت، آئی ٹی، معدنیات اور توانائی کے شعبوں میں سرمایہ کاری کی دعوت دی۔

 ملاقات میں وزیراعظم نے صدر ٹرمپ کی جانب سے پاکستان کے کردار کی عوامی سطح پر توثیق پر شکریہ ادا کیا اور سیکیورٹی و انٹیلی جنس تعاون مزید بڑھانے کی ضرورت پر زور دیا۔

آخر میں وزیراعظم شہباز شریف نے صدر ڈونلڈ ٹرمپ کو پاکستان کے سرکاری دورے کی دعوت بھی دی۔