صدرِ مملکت صدر آصف علی زرداری نے کہا کہ ماحولیاتی تبدیلی پاکستان کی سیاحتی ترقی کے لیے بڑا چیلنج ہے۔

صدر آصف علی زرداری نے عالمی یومِ سیاحت 2025 کے موقع پر خصوصی پیغام دیتے ہوئے کہا کہ پاکستان میں سیاحت پائیدار ترقی کا ذریعہ بن سکتی ہے، سیاحت اور پائیدار تبدیلی عالمی یومِ سیاحت 2025 کا موضوع قرار دیا گیا ہے۔

 صدر زرداری نے کہا کہ ماحولیاتی تبدیلی پاکستان کی سیاحتی ترقی کے لیے بڑا چیلنج ہے، گلیشیئرز کا پگھلاؤ اور شدید موسمی حالات سیاحتی ورثے کے لیے خطرہ ہے، انتہاپسندی اور عدم برداشت پاکستان کی سیاحت کے فروغ میں بڑی رکاوٹ ہیں۔

یہ بھی پڑھیں: حکومت کا سیاحت کے فروغ کے لئے اہم قدم

آصف علی زرداری کا کہنا تھا کہ سیاحت سے مقامی معیشت کو فروغ، خواتین و نوجوانوں کو بااختیار بنایا جا سکتا ہے، حکومتِ پاکستان سیاحت کو اقوام متحدہ کے ترقیاتی اہداف سے ہم آہنگ کر رہی ہے، گرین سرٹیفیکیشن، کمیونٹی بیسڈ اور ماحولیاتی سیاحت پر توجہ دینے کی ضرورت ہے۔

صدر مملکت نے کہا کہ سیاحت، امن و ہم آہنگی کے فروغ اور ثقافتی ورثے کے تحفظ کا مؤثر ذریعہ ہے، پاکستان قدرتی حسن، ورثے اور مہمان نوازی کا حامل ملک ہے، سیاحت کے فروغ میں نجی شعبہ، سول سوسائٹی اور نوجوانوں کا کلیدی کردار ادا کر سکتے ہیں۔

صدرِ پاکستان نے سیاحت کو قومی ترجیح بنانے پر زور، پاکستان کو عالمی سیاحتی مرکز بنانے کے لیے سب کو مل کر کام کرنا ہوگا۔