وفاقی وزیر اطلاعات عطاء اللہ تارڑ نے کہا کہ پاکستان نے ہمیشہ امن اور انصاف کی بات کی ہے،  بھارت پانی کو بطور ہتھیار استعمال کر رہا ہے۔

وفاقی وزیر اطلاعات عطاء اللہ تارڑ کا سابق سیکریٹری خارجہ اعزاز احمد چوہدری کی پاک بھارت تعلقات پر مبنی کتاب کی تقریب رونمائی سے خطاب کرتے ہوئے کہا کہ اعزاز احمد چوہدری نے پاکستان کے لیے نمایاں خدمات انجام دیں ہیں۔

وفاقی وزیر اطلاعات نے کہا کہ پاکستان اور بھارت کے تعلقات کو دو قومی نظریہ کے تناظر میں دیکھنا چاہیے، پاکستان نے کبھی بھی جارحیت کا راستہ نہیں اپنایا، پاکستان نے ہمیشہ خطے میں امن کے لیے کلیدی کردار ادا کیا۔

یہ بھی پڑھیں: بھارت کی آبی جارحیت جاری؛ دریائے ستلج میں شدید سیلاب کا خطرہ، ہنگامی الرٹ جاری

عطاء اللہ تارڑ کا کہنا تھا کہ افواج پاکستان نے بھارتی جارحیت کو ناکام بنایا، پاک فوج نے ہمیشہ ملکی دفاع کے لئے اہم کردار ادا کیا، بھارت کی موجودہ حکومت نے اقلیتوں کی زندگی کو اجیرن بنادیا ہے۔

وفاقی وزیر اطلاعات نے کہا کہ بھارتی حکومت اب دنیا میں دہشت گردی میں ملوث ہے، کینیڈا اور دیگر ملکوں میں سکھوں کے قتل کے واقعات بھارتی دہشت گردی کا واضح ثبوت ہیں۔

عطاء اللہ تارڑ نے کتاب کی تقریب رونمائی سے خطاب کرتے ہوئے کہا کہ پاکستان نے کامیاب سفارت کاری کے ذریعے دنیا میں اپنا نقطہ نظر موثر انداز میں پیش کیا، پاکستان نے دہشت گردی کے خلاف جنگ میں سب سے زیادہ قربانیاں دی ہیں، ہماری افواج نے پاکستان کو ہی نہیں دنیا کو محفوظ بنانے کے لیے قربانیاں دیں، بھارت پاکستان میں دہشت گردی میں ملوث ہے۔