راولپنڈی: فیلڈ مارشل عاصم منیر نے پشاور کا اہم دورہ کیا جہاں انہیں آپریشنل تیاریوں اور سیکیورٹی صورتحال پر تفصیلی بریفنگ دی گئی جب کہ اس موقع پر آرمی چیف نے افغانستان اور بھارت کے حمایت یافتہ فتنہ الخوارج کو واضح پیغام دے دیا۔

پاک فوج کے شعبہ تعلقات عامہ (آئی ایس پی آر) کے مطابق فیلڈ مارشل عاصم منیر کو ہیڈکوارٹر 11 کور میں خیبرپختونخوا کی مجموعی سیکیورٹی صورتحال اور آپریشنل تیاریوں پر بریفنگ دی گئی۔ دورے کے موقع پر کمانڈر پشاور کور نے فیلڈ مارشل کا استقبال کیا۔

قبائلی عمائدین سے ملاقات

آئی ایس پی آر نے بتایا کہ فیلڈ مارشل نے جرگے میں قبائلی عمائدین سے ملاقات کی جس میں امن و استحکام اور دہشت گردی کے خلاف اقدامات پر تفصیلی بات چیت ہوئی۔

عمائدین نے سیکیورٹی فورسز کے ساتھ مکمل تعاون کے عزم کا اعادہ کرتے ہوئے کہا ’’فتنہ الخوارج اور فتنہ الہندوستان‘‘ جیسی گمراہ کن سوچ کو قبائل میں کوئی پذیرائی حاصل نہیں۔

قبائلی عوام کے عزم کو خراجِ تحسین

فیلڈ مارشل عاصم منیر نے دہشت گردی کے خلاف قبائلی عوام کے کردار، قربانیوں اور بہادری کو خراجِ تحسین پیش کیا۔

انہوں نے کہا کہ قبائلی عوام نے ملک کے امن اور استحکام کے لیے ہمیشہ اہم کردار ادا کیا ہے۔

پاکستان کا مؤقف: ہمسایوں سے امن چاہتے ہیں

فیلڈ مارشل عاصم منیر نے واضح کیا کہ پاکستان اپنے تمام ہمسایوں کے ساتھ پرامن تعلقات چاہتا ہے تاہم انہوں نے خبردار کیا کہ افغانستان کی سرزمین سے پاکستان کے خلاف کسی بھی دہشت گردی کو برداشت نہیں کیا جائے گا۔

افغان حکومت پر تنقید

آرمی چیف نے کہا کہ پاکستان نے افغانستان کے ساتھ تعلقات بہتر بنانے کی کئی کوششیں کیں لیکن افغان طالبان حکومت نے بھارتی حمایت یافتہ گروہوں کو سہولت فراہم کی۔

انہوں نے زور دیا کہ خیبرپختونخوا کو دہشت گردوں اور ان کے سہولت کاروں سے مکمل طور پر پاک کیا جائے گا۔