پاکستان کی وزارتِ اطلاعات و نشریات نے اسرائیلی نگرانی میں پاک فوج غزہ بھیجنے کی بھارتی چینل کے گمراہ کن دعوؤں کی تردیدکردی ہے۔

ریپبلک ٹی وی نے جھوٹا دعویٰ کیا کہ پاکستان مغربی ممالک اور اسرائیل کی نگرانی میں 20 ہزار فوجی غزہ بھیجنے کی تیاری کر رہا ہے۔

گودی میڈیا کے چینل نے مضحکہ خیز دعویٰ کیا کہ پاکستان نے اپنے پاسپورٹ سے ’’اسرائیل کیلئےنا قابل استعمال‘‘ کی شق بھی ختم کر دی ہے۔

اس جھوٹے پروپیگنڈے جواب میں وزارت خارجہ پاکستان کی جانب سے ایک پریس ریلیز جاری کی گئی، جس کے مطابق پاسپورٹ کی شق بدستور برقرار ہے، اور اس میں کوئی تبدیلی نہیں کی گئی ہے۔

یہ بھی پڑھیں: بھارتی پروپیگنڈا بےنقاب؛ اقوام متحدہ میں پاکستان کا بھارت کو کرارا جواب

ڈائریکٹوریٹ جنرل آف امیگریشن اینڈ پاسپورٹس کے مطابق پاکستانی پاسپورٹ پر اب بھی درج ہے کہ ’’یہ پاسپورٹ اسرائیل کے علاوہ تمام ممالک کے لیے قابلِ استعمال ہے۔‘‘

بھارتی چینل کا پروپیگنڈا بے نقاب کرتے ہوئے وزارتِ اطلاعات و نشریات پاکستان نے واضح کیا کہ پاکستان کا اسرائیل سے متعلق مؤقف بالکل واضح اور دو ٹوک ہے۔

وزارتِ اطلاعات و نشریات پاکستان کے مطابق پاکستان نے نہ کبھی اسرائیل کو تسلیم کیا نہ ہی کسی قسم کا فوجی تعاون زیرِ غور ہے۔

پاکستان کا فلسطینی حقِ خود ارادیت کی حمایت میں مؤقف واضح اور اصولی  ہے۔

ریپبلک ٹی وی کا من گھڑت دعویٰ کسی علاقائی یا بین الاقوامی میڈیا نے رپورٹ نہیں کیا، بے بنیاد اور من گھڑت کہانیاں گھڑ کر پاکستان کیخلاف زہریلا پروپیگنڈا کرنا گودی میڈیا کا وطیرہ ہے۔