اسلام آباد: وفاقی حکومت نے تحریکِ لبیک پاکستان (ٹی ایل پی) پر باضابطہ طور پر پابندی عائد کرتے ہوئے اسے انسدادِ دہشت گردی ایکٹ 1997 کے تحت کالعدم تنظیم قرار دے دیا ہے۔

وزارتِ داخلہ کی جانب سے اس حوالے سے نوٹیفکیشن جاری کردیا گیا ہے جس کی نقول ٹی ایل پی قیادت، الیکشن کمیشن آف پاکستان، تمام صوبائی حکومتوں اور متعلقہ اداروں کو فوری عملدرآمد کے لیے بھیج دی گئی ہیں۔

وزارتِ قانون نے قانونی کارروائی شروع کردی

ذرائع کے مطابق وزارتِ قانون نے پابندی برقرار رکھنے کے لیے درکار قانونی کارروائی کا آغاز کردیا ہے۔

اٹارنی جنرل کے دفتر سے مشاورت کے بعد سپریم کورٹ میں باضابطہ ریفرنس دائر کیا جائے گا۔ عدالتِ عظمیٰ اس ریفرنس میں فراہم کردہ شواہد کا جائزہ لے گی اور باقاعدہ سماعت کے بعد حتمی فیصلہ کرے گی۔

یہ ریفرنس آئین کے آرٹیکل 17 (2) اور (3) کے تحت دائر کیا جارہا ہے، جو اُن سیاسی جماعتوں پر قدغن لگانے سے متعلق ہے جو قومی سلامتی یا عوامی نظم و ضبط کے خلاف سرگرمیوں میں ملوث ہوں۔

ٹی ایل پی کی مبینہ پرتشدد سرگرمیوں کے شواہد شامل

ذرائع کا کہنا ہے کہ وفاقی حکومت سپریم کورٹ میں جمع کرائے جانے والے ریفرنس کے ساتھ ٹی ایل پی کی مبینہ پرتشدد اور دہشت گردانہ سرگرمیوں کے شواہد بھی پیش کرے گی۔

حکام نے تصدیق کی کہ ریفرنس ترجیحی بنیادوں پر تیار کیا جارہا ہے اور جلد جمع کرا دیا جائے گا۔

کراچی میں ٹی ایل پی دفاتر اور مدارس کی تفصیلات جمع

دوسری جانب وفاقی حکومت کے فیصلے کے بعد کراچی میں قانون نافذ کرنے والے اداروں نے کالعدم تنظیم کے دفاتر اور منسلک مدارس کا تفصیلی ڈیٹا جمع کرلیا ہے۔

ذرائع کا بتانا ہے کہ شہر بھر میں درجن سے زائد مقامات کی نشاندہی کی جاچکی ہے جب کہ باقی تفصیلات اکٹھی کرنے کا عمل جاری ہے تاکہ ٹی ایل پی نیٹ ورک کا مکمل نقشہ تیار کیا جاسکے۔

دفاتر سیل اور منتظمین کے خلاف کارروائی کا فیصلہ

حکام نے بتایا کہ ٹی ایل پی کے تمام دفاتر جو لاہور میں قائم مرکزی کمانڈ کے ماتحت کام کررہے تھے، سیل کردیے جائیں گے۔ قانون نافذ کرنے والے اداروں نے ان دفاتر کے منتظمین اور مالی معاونین کی نشاندہی بھی کرلی ہے۔

ایک سینئر افسر نے بتایا ’’جو افراد تشدد پر اکسانے یا تخریبی سرگرمیوں میں ملوث پائے گئے، اُن کے خلاف سخت کارروائی کی جائے گی جب کہ ٹی ایل پی کے غیر قانونی سرگرمیوں میں ملوث عناصر کے گرد گھیرا تنگ کیا جا رہا ہے‘‘۔

کراچی میں کریک ڈاؤن کی تیاری مکمل

ذرائع نے مزید بتایا کہ وزارتِ داخلہ کی ہدایات پر عمل کرتے ہوئے کراچی میں جلد بھرپور کریک ڈاؤن متوقع ہے۔ یہ کارروائی وفاقی حکومت کے اُس فیصلے کا تسلسل ہے جس کے تحت تحریکِ لبیک پاکستان کو انسدادِ دہشت گردی ایکٹ کے تحت کالعدم قرار دیا گیا ہے۔