کراچی سمیت ملک بھر میں ٹماٹر کی قیمت کو پر لگ گئے، 500 سے 600 روپے فی کلو تک  فروخت ہونے لگے۔

 شہرقائد کے بازاروں میں ٹماٹر کے مختلف بھاؤ وصول کیے جارہے ہیں، شہاب الدین مارکیٹ صدر  میں ٹماٹر 500 روپے کلو، جبکہ فیڈرل بی ایریا، گلشن اقبال، برنس روڈ اور پوش علاقوں میں 650 روپے کلو تک فروخت ہورہے ہیں۔

دوسری جانب خریداروں نے شکوہ کیا کہ ٹماٹر مرغی کے گوشت سے بھی مہنگے ہو گئے ہیں۔

شہر کے کسی بھی بازار میں ٹماٹر کی قلت نہیں مگر قیمت تمام سبزیوں کی نسبت بہت زیادہ ہے۔

واضح رہے کہ کراچی میں مرغی کا گوشت 400 روپے سے 470 روپے میں فروخت ہورہا ہے۔

اسی  طرح حیدرآباد میں بھی ٹماٹر خریدنا اب خواب بن گیا ہے، جہاں ٹماٹر کی قیمت 6 سو روپے کلو تک پہنچ گئی۔

دکاندار کا کہنا ہے کہ ٹماٹر 550 روپے کلو ہمیں منڈی سے مل رہا ہے، 3 سو روپے کلو  میں فروخت کررہے تھے اچانک قیمتیں بڑھ گئیں۔

یہ بھی پڑھیں: سرخ رنگ کی نسبت جامنی ٹماٹر صحت کے لیے کیوں زیادہ مفید ہیں؟

دکاندار نے مزید کہا کہ منڈی کہ آڑھتی کہتے ہیں ٹماٹر ایران سے آرہا ہے، ملک میں ٹماٹر نہیں ہے تو مزید مہنگا ہوسکتا ہے۔

سکھر شہر اور گردونواح کے علاقوں میں ٹماٹر چار سو روپے فی کلو فروخت ہونے لگا ہے۔

لاہور میں بھی ٹماٹر کی قیمت میں اضافہ  دیکھنے میں آیا ہے، 155 روپے فی کلو مقرر کیے گئے سرکاری ریٹ کے برعکس بازار وں میں ٹماٹر 600 روپے فی کلو میں فروخت ہورہے ہیں، جبکہ مہنگے ہونے کی وجہ سے کئی دکانداروں نے ٹماٹر رکھنا  چھوڑ دیے۔

ملتان میں بھی ٹماٹر کے ریٹ 400 روپے کلو سے تجاوز کر گئے۔

کوئٹہ اور پشاور میں بھی ٹماٹر سمیت دیگر سبزیوں کی قیمتوں میں روز بروز اضافہ ہورہا ہے۔

کوئٹہ میں ٹماٹر 350 جبکہ پشاور میں 360 روپے فی کلو میں فروخت ہورہے ہیں۔