ایس پی عدیل اکبر کی میڈیکل رپورٹ اور چھٹی کی درخواست منظر عام پر آگئی ہے۔ مبینہ طور پر خودکشی کرنے والے اسلام آباد پولیس کے افسر نے بیماری کے باعث 3 دن کی طبی رخصت کی درخواست دی تھی۔

تاہم ان کی چھٹی منظور نہیں کی گئی، اسی وجہ سے وہ ڈیوٹی پر موجود تھے۔ مگر اب خودکشی کے بعد  ان کی چھٹی کا نوٹیفیکیشن جاری کردیاگیا ہے ۔

چھٹی کے نوٹیفیکشن پر بھی 23اکتوبر درج ہے۔ قریبی ذرائع کا کہناہے کہ مرحوم چھٹی نہ ملنے کی وجہ سے زہنی دبائو کا شکار تھے۔

پولیس کی جانب سے بظاہر  فیس سیونگ کے لیے نوٹیفکیشن جاری کیا گیا ۔ عجلت میں جاری نوٹیفکیشن میں تاریخ بھی ہاتھ سے لکھی گئی۔

ابھی ان کی  سٹڈی کی چھٹی کا معاملہ بھی زیر التوا تھا۔

میڈیکل رپورٹ کے مطابق عدیل اکبر کا ڈینگی ٹیسٹ 20 اکتوبر کو مثبت آیا تھا۔ ڈاکٹرز نے انہیں 3 دن تک مکمل آرام کا مشورہ دیا تھا۔

دستاویزات کے مطابق عدیل اکبر نے بیماری کے باعث اپنی رخصت کی درخواست ڈی آئی جی اسلام آباد کو ارسال کی تھی۔

طبی رخصت سے متعلق اطلاع اے آئی جی اسٹیبلشمنٹ اسلام آباد کو بھی دی گئی تھی۔

عدیل اکبر نے استدعا کی تھی کہ انہیں 20 سے 22 اکتوبر تک طبی بنیادوں پر چھٹی دی جائے تاکہ وہ صحت یاب ہو سکیں۔

ذرائع کا کہنا ہے کہ چھٹی کی منظوری نہ ملنے کے باعث ایس پی عدیل اکبر شدید بخار کے دوران بھی ڈیوٹی انجام دے رہے تھے۔