کراچی: ای چالان سسٹم کے خلاف مرکزی مسلم لیگ نے سندھ ہائیکورٹ میں پٹیشن دائر کردی۔

مرکزی مسلم لیگ نے ای چالان سسٹم کے خلاف سندھ ہائیکورٹ میں پٹیشن دائر کی ہے جس میں چیف سیکرٹری سندھ، آئی جی سندھ، ڈی آئی جی ٹریفک، نادرا اور ایکسائز کو فریق بنایا گیا ہے۔

مرکزی مسلم لیگ کی جانب سے پٹیشن دائر کرنے والی قانونی ٹیم میں مدثر اقبال چوہدری، محمد سراج اور نصیر اقبال ایڈووکیٹ شامل ہیں۔

ای چالان سسٹم کی ناانصافیوں پر اعتراضات

مرکزی مسلم لیگ کراچی کے صدر احمد ندیم اعوان نے میڈیا سے گفتگو کرتے ہوئے کہا ’’کراچی کا انفرااسٹرکچر تباہ ہوچکا ہے، سڑکیں ٹوٹ پھوٹ کا شکار ہیں اور سندھ حکومت نے ای چالان سسٹم کو صرف پیسہ بٹورنے کا ذریعہ بنا دیا ہے‘‘۔

احمد ندیم اعوان نے مزید کہا کہ شہریوں کو شناختی کارڈ بلاک کرنے کی دھمکیاں غیر قانونی ہیں اور اس کا مقصد شہریوں کو غیر ضروری طور پر پریشان کرنا ہے۔

احمد ندیم اعوان نے کراچی کے ساتھ مسلسل ناانصافی کے خلاف قانون کے دروازے کو کھٹکھٹانے کا اعلان کرتے ہوئے کہا ’’ہم ایک ملک میں دو قانون نہیں مان سکتے، لاہور میں چالان 200 روپے کا ہے جب کہ کراچی میں 5 ہزار روپے کیوں؟‘‘۔

مرکزی مسلم لیگ نے اعلان کیا کہ اگر ناانصافی کا سلسلہ نہ روکا گیا تو وہ اپنی قانونی جدوجہد کو مزید وسعت دیں گے اور ای چالان سسٹم کے خلاف بھرپور احتجاج کریں گے۔