پاک افغان سرحد پر افغانستان کی جانب گزشتہ شب بلا اشتعال فائرنگ کی گئی، تاہم پاک فوج نے جوابی کارروائی کرتے ہوئے دہشتگردوں کے ٹھکانوں کو کامیابی سے نشانہ بنایا، اس حالیہ پاک افغان کشیدگی  پر عالمی رہنماؤں کی جانب سے تشویش کا اظہار کیا گیا ہے۔

سعودی عرب

سعودی وزارت خارجہ کی جانب سے پاکستان اور افغانستان کے درمیان تازہ جھڑپوں پر گہری تشویش کا اظہار کرتے ہوئے فریقین کو تحمل مزاجی سے کام لینے پر زور دیا ہے۔

سعودی وزارت خارجہ کی جانب سے جاری کردہ بیان میں کہا گیا ہے کہ پاکستان اور افغانستان کے درمیان جھڑپوں پر گہری تشویش ہے۔

 سعودی عرب پاکستان اور افغانستان دونوں ممالک کی عوام کے لیے امن،سلامتی اور استحکام کا خواہشمند ہے، دونوں فریقین تحمل مزاجی کا مظاہرہ کرتے ہوئے معاملات کو مذاکرات کے ذریعے حل کریں۔

ایران

ایرانی وزارت خارجہ نے بھی پاکستان اور افغانستان کی حالیہ کشیدگی پر تشویش کا اظہار کیا ہے۔

ایرانی وزارت خارجہ کے ترجمان اسماعیل بقائی نے کہا ہے کہ ہر ملک کی علاقائی سالمیت اور قومی خودمختاری کا احترام ضروری ہے، کشیدگی کم کرنے کے لیے پاکستان اور افغانستان فوری مذاکرات کریں۔

یہ بھی پڑھیں: پاک افغان سرحد پر کشیدگی؛ پاکستان کی جوابی کارروائی میں متعدد افغان پوسٹیں تباہ، 19 پر قبضہ

اسماعیل بقائی نے مزید کہا کہ ایران پڑوسیوں میں کشیدگی کم کرانے میں مدد کے لیے تیار ہے۔

قطر

قطری وزارت خارجہ نے بھی پاکستان اور افغانستان کے درمیان کشیدگی پر تشویش کا اظہار کرتے ہوئے کہا کہ دونوں ممالک تحمل، بات چیت اور سفارتکاری سے مسائل حل کریں، خطے میں امن و استحکام کے لیے کشیدگی میں کمی ناگزیر ہے۔

قطری وزرات خارجہ نے مزید کہا کہ پاکستان اور افغانستان کے عوام کے امن و خوشحالی کے لیے پُرعزم ہیں، پاکستان اور افغانستان کے درمیان کشیدگی خطے کے امن پر منفی اثر ڈال سکتی ہے۔