پاکستان خلائی ٹیکنالوجی کے نئے دور میں داخل ہوگیا ہے، تاہم پاکستان نے پہلا ہائپر اسپیکٹرل سیٹلائٹ کامیابی سے لانچ کردیا ہے۔

ترجمان دفتر خارجہ کے مطابق اسپارکو نے چین کے سیٹلائٹ لانچ سینٹر سے ایچ ایس ون سیٹلائٹ لانچ کیا، ایچ ایس ون جدید ہائپر اسپیکٹرل امیجنگ ٹیکنالوجی سے مزین ہے، سیٹلائٹ سینکڑوں اسپیکٹرل بینڈز میں ڈیٹا حاصل کرنے کی صلاحیت رکھتا ہے۔

ترجمان نے بتایا کہ ایچ ایس ون سے زمین کے استعمال، فصلوں، پانی اور شہری ترقی کا درست تجزیہ ممکن ہوگا اور سیٹلائٹ ماحولیاتی نگرانی اور قدرتی آفات کے انتظام میں مددگار ثابت ہوگا۔

دفتر خارجہ کے ترجمان کا کہنا تھا کہ ایچ ایس ون سے وسائل کے بہتر استعمال اور ماحولیاتی مزاحمت میں اضافہ ہوگا، سیٹلائٹ منصوبہ سی پیک کے تحت پائیدار ترقیاتی منصوبوں میں معاون ہوگا۔

ترجمان دفتر خارجہ کے مطابق ایچ ایس ون خلا میں پاکستان کے ترقیاتی سفر کا نیا سنگِ میل ہے، اسپارکو نے خلائی ٹیکنالوجی کے ذریعے قومی ترقی کے عزم کو دہرا دیا۔

ترجمان کی جانب کہا گیا کہ پاکستان اور چین کے درمیان خلائی تعاون پُرامن اور ترقیاتی مقاصد کے لیے جاری ہے، تاہم ڈپٹی وزیراعظم اسحاق ڈار نے پاکستانی و چینی سائنسدانوں کی کاوشوں کو سراہا ہے۔