واشنگٹن: وفاقی وزیرِ خزانہ سینیٹر محمد اورنگزیب نے حالیہ دورۂ واشنگٹن ڈی سی کے دوران عالمی مالیاتی اداروں، بین الاقوامی تنظیموں اور امریکی کاروباری برادری کے اعلیٰ سطحی نمائندوں سے متعدد اہم ملاقاتیں کیں، جن کا مقصد پاکستان کے معاشی اصلاحاتی ایجنڈے کو فروغ دینا، سرمایہ کاری کے مواقع کو اجاگر کرنا اور بین الاقوامی مالیاتی تعاون کو مزید مستحکم بنانا تھا۔

آئی ایم ایف سے مذاکرات اور معاشی استحکام کا عزم

وزیرِ خزانہ نے واشنگٹن میں بین الاقوامی مالیاتی فنڈ (آئی ایم ایف) کے ڈائریکٹر جہاد ازعور سے خصوصی ملاقات کی، جس میں پاکستان کے جاری اصلاحاتی ایجنڈے اور اقتصادی بہتری پر تفصیلی بات چیت کی گئی۔ اس موقع پر ایکسٹینڈڈ فنڈ فیسلٹی (ای ایف ایف) کے دوسرے جائزے کے حوالے سے بھی تبادلہ خیال ہوا۔ دونوں فریقوں نے میکرو اکنامک استحکام کو برقرار رکھنے پر اتفاق کیا۔

کامن ویلتھ وزرائے خزانہ اجلاس میں شرکت

سینیٹر اورنگزیب نے کامن ویلتھ وزرائے خزانہ اجلاس میں شرکت کرتے ہوئے پائیدار اور مضبوط کامن ویلتھ کے قیام پر زور دیا۔ انہوں نے انفراسٹرکچر اور مالیاتی لچک فنانشل ریزیلینس کو فروغ دینے کے لیے ہب کے قیام کی حمایت کی، اور ترقی پذیر ممالک کے لیے موسمیاتی مالی معاونت کی فوری ضرورت پر روشنی ڈالی۔ اس دوران انہوں نے “نقصان و ڈیمیج فنڈ” کے جلد نفاذ کی اہمیت کو بھی اجاگر کیا۔

عالمی بینک اور دیگر اداروں سے ملاقاتیں

محمد اورنگزیب نے ورلڈ بینک گروپ کے سینئر منیجنگ ڈائریکٹر ایکسل وین ٹروٹسین برگ سے ملاقات کی، جس میں ترقیاتی منصوبوں اور موسمیاتی موافقت پر بات چیت ہوئی۔ وزیرِ خزانہ نے پاکستان میں آنے والے تباہ کن سیلابوں کو موسمیاتی خطرات کی مثال قرار دیتے ہوئے قدرتی آفات سے نمٹنے کے لیے مالی وسائل بڑھانے کی ضرورت پر زور دیا۔

یہ بھی پڑھیں: پاکستان اور روس کا تیل، گیس و معدنیات کے شعبے میں شراکت داری بڑھانے پر اتفاق

اسی دوران، انہوں نے آئی ایف سی آئی ایف سی کے ریجنل وائس پریذیڈنٹ ریکارڈو پولیتی سے بھی ملاقات کی، جس میں پاکستان میں نجی سرمایہ کاری کے فروغ اور ریکوڈک منصوبے کی مالی تکمیل کے عمل کو تیز کرنے پر اتفاق ہوا۔ اسلام آباد میں آئی ایف سی کے نئے دفتر کے قیام کا خیرمقدم بھی کیا گیا۔

امریکی بزنس کونسل اور سرمایہ کاری کے مواقع

وزیرِ خزانہ نے یو ایس پاکستان بزنس کونسل کے اراکین سے بھی ملاقات کی، جہاں انہوں نے پاکستان کے معاشی اشاریوں میں بہتری کو نمایاں کرتے ہوئے سرمایہ کاروں کو مائننگ، زراعت، آئی ٹی اور فارماسیوٹیکل جیسے شعبوں میں سرمایہ کاری کی دعوت دی۔ انہوں نے کہا کہ حکومت کاروباری برادری کے مسائل حل کرنے کے لیے پُرعزم ہے، اور حالیہ پاک-امریکہ تجارتی معاہدہ اس جانب ایک مثبت قدم ہے۔

امریکی محکمہ خزانہ اور قانون سازی

امریکی محکمہ خزانہ کے حکام سے ملاقات میں پاکستان کی معاشی بنیادوں، اصلاحاتی عمل، اور ورچوئل اثاثوں کی ریگولیشن سے متعلق مکمل شدہ قانون سازی پر بھی تبادلہ خیال کیا گیا۔ وزیرِ خزانہ نے امریکی کمپنیوں کو توانائی، معدنیات، زراعت اور ٹیکنالوجی کے شعبوں میں شراکت داری کی دعوت دی۔

اسلامی ترقیاتی بینک اور سٹی بینک سے تعاون

وزیرِ خزانہ نے اسلامی ترقیاتی بینک کے صدر ڈاکٹر محمد الجاسر سے بھی ملاقات کی اور ایم-6 موٹروے کے دو حصوں کے لیے مالی معاونت پر شکریہ ادا کیا۔ ملاقات میں پولیو کے خاتمے اور تیل فنانسنگ سہولت پر جاری تعاون کو مزید بڑھانے پر اتفاق ہوا۔ علاوہ ازیں، سٹی بینک کے نمائندوں نے پاکستان کے جاری اصلاحاتی اقدامات پر اعتماد کا اظہار کیا۔

بین الاقوامی میڈیا سے رابطے اور سفارتی مصروفیات

اپنے دورے کے دوران محمد اورنگزیب نے کئی بین الاقوامی میڈیا اداروں کو انٹرویوز دیے، جن میں انہوں نے پاکستان کے معاشی وژن اور عالمی شراکت داریوں پر روشنی ڈالی۔ اس کے علاوہ، وہ واشنگٹن میں پاکستانی سفیر کی جانب سے دیے گئے عشائیے میں بھی شریک ہوئے۔