پاکستان اور افغانستان کے درمیان حالیہ کشیدگی کے تناظر میں قطر کے دارالحکومت دوحہ میں ہونے والے مذاکرات میں ایک اہم اور تاریخی پیش رفت سامنے آئی ہے، جس کے تحت دونوں ہمسایہ ممالک نے فوری جنگ بندی پر اتفاق کر لیا ہے۔ اس بات کی تصدیق قطرکی وزارتِ خارجہ کی جانب سے جاری کردہ اعلامیے میں کی گئی ہے۔

قطری وزارت خارجہ کی جانب سے جاری کردہ اعلامیہ کے مطابق پاکستان، افغانستان دوحہ مذاکرات کی میزبانی ریاستِ قطر اور جمہوریہ ترکیہ نے کی،  دوران مذاکرات پاکستان اور افغانستان نے جنگ بندی کا فیصلہ کرتے ہوئے پائیدار امن اور استحکام کے لیے میکنزم پر اتفاق کیا۔

اعلامیے میں بتایا گیا کہ پاکستان اور افغانستان نے فالو اپ ملاقاتوں پر رضامندی ظاہر کرتے ہوئے، جنگ بندی کے تسلسل اور عملدرآمد کو یقینی بنانے پر بھی اتفاق کیا گیا۔

یہ بھی پڑھیں: جنگ بندی معاہدہ؛ پاکستان اور افغانستان ایک دوسرے کی سرزمین کا احترام کریں گے، خواجہ آصف

اعلامیے میں کہاگیا کہ پاکستان اور افغانستان کی جانب سے امن اور استحکام کے لیے مذاکرات کا سلسلہ جاری رکھنے کا فیصلہ کیا گیاہے۔

اعلامیے مطابق قطر کی وزارتِ خارجہ نے جنگ بندی معاہدے کو خوش آئند قرار دیتے ہوئے امید ظاہر کی کہ یہ اقدام سرحدی کشیدگی ختم کرنے میں مدد دے گا۔

مزید برآں، قطر نے اس پیش رفت کو خطے میں پائیدار امن کی بنیاد قرار دیا ہے، اور امید ظاہر کی ہے کہ یہ اقدام افغانستان اور پاکستان کے عوام کے درمیان اعتماد سازی میں بھی اہم کردار ادا کرے گا۔