استنبول: پاک بحریہ کے دوسرے بابر، ملجم کلاس کورویٹ پی این ایس خیبر نے اپنے فائر ٹرائلز کامیابی کے ساتھ مکمل کر لیے۔

ٹرائلز کے دوران پاک بحریہ کے جہاز بابر کلاس کورویٹ نے زمین، فضا اور سطح آب پر مختلف اہداف کو انتہائی درستگی سے نشانہ بنایا۔

ترک نیول شپ یارڈ استنبول میں تیار کیے گئے پی این ایس خیبر نے اپنے پرائمری اور سیکنڈری ویپن سسٹمز، جن میں 76 ملی میٹر مین گن اور 25 ملی میٹر ریموٹ کنٹرول گن سسٹم شامل ہیں، اس کے ذریعے اہداف پر شاندار فائرنگ کر کے اپنی مکمل آپریشنل صلاحیت کا مظاہرہ کیا۔

ان فائر ٹرائلز کے بعد پی این ایس خیبر اب ترک بحریہ کے ساتھ مشترکہ آپریشنز میں حصہ لے گا، ان آپریشنز کی کامیاب تکمیل کے بعد جہاز پاکستان کے لیے اپنے پہلے سفر کا آغاز کرے گا۔

ترک ماہرین کے تعاون سے تیار ہونے والا یہ جہاز اپنے آؤٹ فٹنگ اور ہاربر ٹرائلز پہلے ہی مکمل کر چکا ہے۔ پی این ایس خیبر، بابر کلاس کے چار جہازوں میں سے دوسرا جہاز ہے جو پاکستان اور ترکی کے درمیان ٹرانسفر آف ٹیکنالوجی پروگرام کے تحت تیار کیا جا رہا ہے۔

بابر کلاس کا پہلا جہاز پی این ایس بابر گزشتہ برس پاک بحریہ کے بیڑے میں شامل کیا گیا تھا جبکہ تیسرے اور چوتھے جہاز پی این ایس بدر اور پی این ایس طارق کراچی شپ یارڈ میں زیرِ تعمیر ہیں۔

پی این ایس بدر تیاری کے آخری مراحل میں ہے اور اس کے سی ٹرائلز رواں برس کے آخر میں متوقع ہیں جبکہ پی این ایس طارق کے ٹرائلز کا آغاز 2026 میں کیا جائے گا۔

کثیر المقاصد بابر کلاس جہاز سطح آب، زیرِ آب اور فضا میں بیک وقت لڑنے کی صلاحیت رکھتے ہیں۔ 108 میٹر طویل اور 2888 ٹن وزنی یہ جہاز 30 ناٹس کی ٹاپ اسپِیڈ، 15 دن کی اینڈیورنس اور 3500 ناٹیکل مائلز کی آپریشنل رینج رکھتے ہیں۔

یہ جہاز لانگ رینج ویپن سسٹم، جدید سینسرز، تھری ڈی سرچ ریڈار، فائر کنٹرول ریڈار اور ہل ماؤنٹڈ سونار سسٹم سے لیس ہیں۔ بابر کلاس کورویٹس کا ڈیزائن اس طرح تیار کیا گیا ہے کہ وہ کیمیائی، حیاتیاتی، ریڈیولوجیکل اور ایٹمی خطرات کا بھی مؤثر مقابلہ کر سکتے ہیں۔

پاک بحریہ کے ترجمان کے مطابق پی این ایس خیبر کی کامیاب آزمائش پاکستان اور ترکی کے درمیان دفاعی شراکت داری کی مضبوطی اور جدید میرین ٹیکنالوجی میں پاک بحریہ کی بڑھتی ہوئی صلاحیتوں کی عکاسی کرتی ہے۔