پاکستان کی سب سے بڑی آئل ریفائنری کمپنی سینرجیکو نے پاک امریکی تجارتی معاہدے کے بعد امریکی خام تیل کی درآمد کا آغاز کردیا ہے۔

ملک میں پہلے امریکی خام تیل کے کارگو بحری جہاز ایم ٹی پیگاسس سینرجیکو کے آئل ٹرمینل پر آج برتھ ہو گا، اس طرح یہ پاکستانی بندرگاہوں پر پہنچنے والا سب سے بڑا امریکی تیل بردار بحری جہاز  ہوگا۔

یہ بھی پڑھیں: پاکستان اور امریکہ کے درمیان اہم تجارتی معاہدہ کامیابی سے طے پا گیا

واضح رہے کہ سینرجیکو پاکستان کی سب سے بڑی آئل ریفائنری کمپنی ہے جس نے پاکستان میں پہلی بار ہیوسٹن سے 10 لاکھ بیرل ویسٹ ٹیکساس انٹرمیڈیٹ (WTI) کروڈ آئل درآمد کیا ہے، جبکہ کمپنی امریکی تیل کا جہاز بلوچستان میں اپنے آئل ٹرمینل پر لے کر آرہی ہے، بحری جہاز پیگاسس امریکی خام تیل لے کر 14 ستمبر کو ہیوسٹن سے روانہ ہوا تھا۔

سینرجیکو  نے اسلام آباد اور واشنگٹن کے درمیان بڑے تجارتی معاہدے کے بعد دو طرفہ تجارت کو بڑھانے کے لیے امریکی تیل کی تاریخی درآمد کی ابتدا کی ہے، جبکہ اسی کمپنی نے پہلے مالی سال 2017 میں بھی ملک میں اب تک کے سب سے بڑے خام تیل کے جہاز کو اپنے آف شور ٹرمینل پر لا کر ایک ریکارڈ قائم کیا تھا۔

 کمپنی کی جانب سے نومبر کے وسط میں دوسرا جبکہ 2026  میں تیسرا کارگو میں لانے کا منصوبہ ہے، اس طرح سینرجیکو امریکہ سے خام تیل درآمد کرنے والی پاکستان کی پہلی کمپنی بن گئی ہے۔

سینرجیکو کی امریکی خام تیل کی پہلی درآمد سے پاک-امریکی تجارتی تعلقات میں نئے دور کا آغاز ہوگیا۔