ترجمان دفتر خارجہ شفقت علی خان نے ہفتہ وار بریفنگ میں بتایا کہ وزیراعظم شہباز شریف نے حالیہ دورۂ ملائیشیا کے دوران دو طرفہ تعلقات کو مزید مستحکم بنانے کے لیے کئی اہم معاہدے اور بات چیت کی۔

 دورے میں تجارت، سرمایہ کاری، دفاع اور سیاحت کے شعبوں میں تعاون بڑھانے پر اتفاق کیا گیا۔

ترجمان کے مطابق، ملائیشیا کی جانب سے وزیراعظم شہباز شریف کو اعزازی ڈگری سے نوازا گیا، جو دونوں ممالک کے درمیان گہرے تعلقات کا مظہر ہے۔

فریقین نے باہمی تعلقات کے ساتھ ساتھ عالمی امور پر بھی مشاورت کی، خاص طور پر مسئلہ فلسطین پر دونوں رہنماؤں نے مشترکہ حمایت کا اعادہ کیا۔

ترجمان نے کہا کہ پاکستان القدس شریف کو فلسطینی ریاست کا دارالحکومت تسلیم کرنے کے مؤقف پر قائم ہے۔ نائب وزیراعظم اسحاق ڈار نے بھی فلسطینی عوام کے حق میں پاکستان کے اصولی مؤقف کو دہراتے ہوئے ایرانی وزیر خارجہ سے ٹیلی فونک رابطہ کیا، جس میں دونوں ممالک نے خطے میں امن اور برادرانہ تعلقات پر گفتگو کی۔

شفقت علی خان نے بتایا کہ وزیراعظم شہباز شریف کی امریکی صدر ڈونلڈ ٹرمپ سے ملاقات بھی ہوئی، جس میں بھارت کے ساتھ کشیدگی کے دوران صدر ٹرمپ کے مثبت کردار کو سراہا گیا۔

ترجمان نے اسرائیل کی جانب سے صمود فلوٹیلا کو روکنے اور مسجد اقصیٰ کی بے حرمتی کی شدید الفاظ میں مذمت کی۔ انہوں نے سابق سینیٹر مشتاق احمد کی رہائی اور وطن واپسی کا بھی خیرمقدم کیا۔

اس کے علاوہ، پاکستان اور تاجکستان کے درمیان دوشنبے میں ہونے والے چھٹے سیاسی مشاورتی اجلاس میں تجارت، توانائی، تعلیم اور دفاع کے شعبوں میں تعاون پر اتفاق کیا گیا، جبکہ کاسا-1000 منصوبے کے جلد آغاز کے عزم کا اعادہ بھی کیا گیا۔

ترجمان نے بتایا کہ پاکستان نے ماسکو میں چار فریقی ورکنگ گروپ اور ماسکو فارمیٹ کے اجلاسوں میں بھی فعال شرکت کی، جس کا مقصد علاقائی استحکام اور تعاون کو فروغ دینا ہے۔