ہنگو میں پولیس گاڑی کے قریب ہونے والے زور دار دھماکے کے نتیجے میں ایس پی آپریشنز اسد زبیر اور دو دیگر پولیس اہلکار شہید ہوگئے جب کہ دو اہلکار زخمی ہوئے۔

پولیس ذرائع کے مطابق غلمینہ کے علاقے میں شدت پسندوں نے پہلے پولیس چوکی کے قریب دھماکا خیز مواد نصب کیا تھا جس میں کوئی جانی نقصان نہیں ہوا۔

تاہم جب ایس پی اسد زبیر اور ان کی ٹیم جائے وقوعہ کا جائزہ لینے کے لیے روانہ ہوئی تو دارابان کے مقام پر ان کی گاڑی کو دوسرا بم دھماکے سے نشانہ بنایا گیا۔

شہداء اور زخمیوں کو اسپتال منتقل کردیا گیا

ڈی ایس پی خانزیب محمند کے مطابق دھماکے میں ایس پی اسد زبیر اور دو کانسٹیبل موقع پر ہی شہید ہوگئے جب کہ دو پولیس اہلکار زخمی ہوئے جنہیں ڈسٹرکٹ ہیڈکوارٹر اسپتال ہنگو منتقل کردیا گیا۔

دھماکے کے بعد علاقے میں پولیس کی اضافی نفری تعینات کردی گئی اور سرچ آپریشن شروع کردیا گیا ہے۔

وزیر داخلہ محسن نقوی کی مذمت اور خراجِ عقیدت

وفاقی وزیر داخلہ محسن نقوی نے ہنگو میں پولیس گاڑی کے قریب دھماکے کی شدید مذمت کرتے ہوئے شہید ایس پی اسد زبیر اور دیگر اہلکاروں کو خراجِ عقیدت پیش کیا۔

انہوں نے کہا کہ ایس پی اسد زبیر اور ان کے ساتھیوں نے وطنِ عزیز کے لیے شہادت کا اعلیٰ ترین درجہ حاصل کیا، ان کی قربانیاں کبھی فراموش نہیں کی جائیں گی۔

وزیر داخلہ نے شہداء کے لواحقین سے دلی ہمدردی اور تعزیت کا اظہار کرتے ہوئے کہا کہ پوری قوم ان کے دکھ میں برابر کی شریک ہے۔

ان کا کہنا تھا ’’ہم شہداء کے خاندانوں کے غم میں شریک ہیں اور ہر ممکن تعاون فراہم کریں گے‘‘۔

دہشت گردی کے خلاف عزم کا اعادہ

محسن نقوی نے کہا کہ خیبرپختونخوا پولیس کے افسران و جوانوں کی قربانیاں ہمیشہ فخر سے یاد رکھی جائیں گی۔

انہوں نے واضح کیا ’’ہمارے شہداء کا خون رائیگاں نہیں جائے گا، حکومت دہشت گردی کے خاتمے کے لیے اپنے عزم پر قائم ہے اور مجرموں کو انصاف کے کٹہرے میں لایا جائے گا‘‘۔