شہر قائد میں فیس لیس ای سسٹم کے نفاذ کے بعد پانچویں روز بھی ٹریفک قوانین کی خلاف ورزی پر چالان کا سلسلہ جاری ہے اور مزید  4136 الیکٹرانک چالان جاری کیے گئے ہیں۔

 سب سے زیادہ 2737 چالان سیٹ بیلٹ نہ باندھنے پر، جبکہ ہیلمٹ نہ پہننے پر 812، اوور اسپیڈنگ پر 116، اور سرخ بتی کا اشارہ توڑنے پر169 چالان جاری کیے گئے۔

یہ بھی پڑھیں: کراچی: 3 دن میں چار کروڑ روپے سے زائد کے ای چالان کر دیے گئے

اسی طرح ڈرائیونگ کے دوران موبائل فون کے استعمال پر 157، ٹنٹڈ گلاسز پر56، نو پارکنک پر 24، اسٹاپ لائن کی خلاف ورزی پر 20 چالان کیے گئے۔

مسافروں کو چھت پر بٹھانے پر20، لین لائن کے استعمال پر 15، رانگ وے پر 8، بے جا لوڈ اور اوور لوڈنگ پر 11 ای چالان جاری کیے گئے، تاہم ٹیکس کی عدم ادائیگی اور فینسی نمبر پلیٹس پر ایک بھی ای چالان جاری نہیں ہوا۔

واضح رہے کہ ٹریفک قوانین کی خلاف ورزی پر گزشتہ پانچ روز میں 22 ہزار 869 ای چالان کردیے گئے۔

ان میں سیٹ بیلٹ نہ باندھنے پر 13 ہزار 366، ہیلمیٹ نہ پہننے پر 4 ہزار 823، دوران ڈرائیونگ موبائل فون استعمال کرنے پر 733 اور ون وے کی خلاف ورزی پر 89 چالان ہوئے۔

اسی طرح تیزرفتاری کا مظاہرہ کرنے پر 2142، ریڈلائن کراس کرنے پر 824، لائن سے ہٹ کر گاڑی چلانے پر 20، اوورلوڈنگ پر 18،کالےشیشوں پر 50، غلط پارکنگ پر 20 ای چالان کردیے گئے۔

گزشتہ پانچ روز کے دوران نوپارکنگ میں گاڑی کھڑی کرنے پر 43، اسٹاپ لائن کی خلاف ورزی پر 60 ،لین لائن کی خلاف ورزی پر 65، بس کی چھت پر بیٹھنے پر 38 ای چالان کیے گئے۔

ٹریفک پولیس حکام کا کہنا ہے کہ ای چالاننگ سسٹم باقاعدہ طور پر فعال کردیا گیا ہے، سسٹم کا مقصد چالان کرنا نہیں بلکہ قوانین پر عملدرآمد کروانا ہے۔

دوسری جانب ڈی آئی جی ٹریفک پیرمحمد شاہ کا کہنا ہے کہ بغیرلائسنس موٹرسائیکل چلانےپر20 ہزار کا چالان ہوگا، تمام شہری اپنےڈرائیونگ لائسنس اپڈیٹ رکھیں۔

پیرمحمد شاہ نے مزید کہا کہ ٹریفک قوانین کی خلاف ورزی پر اب کسی کو چھوٹ نہیں، تمام چھوٹی بڑی گاڑیوں کی اسپیڈ لمٹ صرف 60 ہے،  60 اسپیڈ سے زیادہ چلانے پر اوور اسپیڈنگ کا ٹکٹ جاری ہوگا۔