پاک افغان مذاکرات میں پش رفت ، دفتر خارجہ نے  ڈیڈ لاک کی تردید کردی ۔ استنبول میں جاری  مذاکرات کے دوران پاکستان کی جانب سے شواہد پر مبنی مطالبات ثالثوں کے حوالے کر دیے گئے۔

دفتر خارجہ کے مطابق معاملات طے ہونے تک افغانستان سے ملحقہ سرحدیں نہیں کھولی جائیں گی۔ترجمان دفتر خارجہ طاہر اندرابی نے اپنی بریفنگ میں بتایاکہ مذاکراتی وفد استنبول میں موجود ہے تاہم مذاکرات کی تکمیل تک تبصرہ نہیں کرسکتے۔

مذاکراتی وفد کی سربراہی قومی سلامتی کے مشیر عاصم ملک کر رہے ہیں۔ ایڈیشنل سیکریٹری خارجہ بھی وفدمیں شامل ہیں۔

ترجمان دفتر خارجہ نے کہا کہ گزشتہ روز پاکستان اور افغان طالبان کے درمیان استنبول میں مذاکرات شروع ہوئے، مذاکرات ثالثوں کی موجودگی اور نگرانی میں ہو رہے ہیں۔

دفترخارجہ کے ترجمان نے چمن بارڈر پر فائرنگ سے متعلق افغان طالبان کا دعویٰ بھی مسترد کر دیا۔ انہوں نے کہا کہ دراصل فائرنگ افغان طالبان کی جانب سے کی گئی اور پاکستان کے سیکیورٹی فورسز نے جواب دیا۔

طاہر اندرابی نے واضح کیا کہ سیکیورٹی صورتحال کو مدنظر رکھ کر بارڈرز سے متعلق کوئی فیصلہ کیا جائے گا۔

ترجمان نے شمالی افغانستان میں تباہ کن زلزلے سے نقصانات پر افسوس و تعزیت کا اظہار کیا۔

غزہ میں امن فوج بھیجنے کا فیصلہ ابھی نہیں ہوا

ترجمان دفتر خارجہ نے واضح کیا کہ غزہ میں امن فوج بھیجنے سے متعلق ابھی کوئی فیصلہ نہیں ہوا۔ انہوں نے کہاکہ اس حوالے سے کوئی بھی فیصلہ پارلیمنٹ ہی کرے گی۔

ہندوستانی میڈیا کی بے بنیاد خبروں پر تبصرہ

ترجمان نے کہا کہ ہندوستانی میڈیا بے بنیاد خبروں کے لیے مشہور ہے۔ بھارتی میڈیا کی انٹیلیجنس افسران کی ملاقاتوں اور پیسے کے حوالے سے افواہیں پریوں کی کہانیاں ہیں۔

انہوں نے کہا کہ بدھ کے روز بھارتی میڈیا نے ہندو یاتریوں کے پاکستان داخلے ہونے سے روکنے کی خبر چلائی، پاکستان اس خبر کی سختی سے تردید کرتا ہے۔

ان کا کہناتھاکہ پاکستان نے 2400 ہندو یاتریوں کو ویزے جاری کیے لہٰذا بھارتی دعوے اور خبریں حقائق کے منافی ہیں۔