سیالکوٹ: وفاقی وزیر دفاع خواجہ آصف نے کہا ہے کہ فیلڈ مارشل عاصم منیر کو استثنیٰ دینے سے آرٹیکل 6 ختم نہیں ہوتا۔

خواجہ آصف نے نجی ٹی وی سے خصوصی گفتگو کرتے ہوئے کہا کہ حکومت کے پاس ترمیم لانے کے لیے نمبر گیم پورے ہیں، حکومت کو ترامیم لانے کے لیے 65 اراکین کی حمایت حاصل ہے، آج 27ویں آئینی ترمیم کے حوالے سے بہت سی باتیں کلیئر ہوجائیں گی۔

انہوں نے کہا کہ سہیل آفریدی کی جو بھی پالیسی ہے وہ ریاست کے ساتھ مطابقت نہیں رکھتی، 27ویں ترمیم میں ہمارے نمبرز پورے ہیں، تمام ترامیم پر اتفاق نہیں ہوسکا، کچھ ترمیم ڈراپ کی گئیں، پیپلزپارٹی اور مولانا فضل الرحمان سے بات ہوچکی ہے۔

خواجہ آصف نے کہا کہ افغانستان کے ساتھ مذاکرات ناکام ہوگئے ہیں، مذاکرات کے3 دور چلےہیں، ایک قطر اور دوسرا استنبول میں ہوا، افغانستان کےساتھ مذاکرات بےنتیجہ نکلے۔

وفاقی وزیر نے کہا کہ ہمارا ایک ہی مطالبہ تھاکہ افغانستان کی سرزمین سے دہشت گردی نہ ہو، کوئی ضمانت دینے کیلئے تیار نہیں تھا، مذاکرات کا کوئی نتیجہ نہیں نکلا جو افسوس کی بات ہے۔

انکا کہنا تھا کہ زبانی بات کرتےتھے، ضمانت سے انکار کرتے تھے، افغانستان کے ساتھ اب مذاکرات ختم ہوچکے ہیں، افغانستان کی سرزمین میں دنیا جہاں کی دہشت گرد تنظیمیں موجود ہیں، دہشت گردوں نے صوبے بانٹے ہوئے ہیں، کابل حکومت کا کنٹرول سارے ملک پر نہیں ہے۔

وزیر دفاع نے کہا کہ پاکستان اپنی سرزمین کی حفاظت کرسکتا ہے، دہشت گردی کاخاتمہ کریں گے، اگرافغانستان سےکوئی دہشت گردی ہوئی تو ہم ردعمل دیں گے، طالبان حکومت کے ساتھ کوئی اعتماد کا رشتہ بحال نہیں ہے۔

خواجہ آصف نے مزید کہا کہ ترکی اور قطر نے نہایت خلوص کے ساتھ کوشش کی، اگر افغانستان سےدہشت گردی جاری رہی تواس کا جواب دیں گے، ہم اپنے ملک کا دفاع کرنا جانتے ہیں، افغانستان کےساتھ کشیدگی میں اضافہ ہوسکتا ہے۔