انٹرنیشنل کرکٹ کونسل   ( آئی سی سی )  نےکرکٹ قوانین میں ایک اور تبدیلی کا فیصلہ  کر لیا ہے۔

تفصیلات  کے مطابق انٹرنیشنل کرکٹ کونسل   نےکرکٹ قوانین میں ایک اور تبدیلی کا فیصلہ  کرتے ہوئے فرنٹ فٹ نو بال  جانچنے کا اختیار فیلڈ آفیشلز  کے بجائے تھرڈ امپائر کو دے دیاہے ۔

فیصلے کے مطابق    فرنٹ فٹ نو بال کا فیصلہ اب فیلڈ آفیشل کے بجائے تھرڈ امپائر کے پاس ہوگا، کسی بھی ڈلیوری کے چند سیکنڈ کے اندر ہی ٹی وی امپائر کو نشریاتی ادارہ فوٹیج بھیج دے گا۔ اگر باؤلر کا پاؤں کریز سے باہر ہوا تو وہ فوری طور پر فیلڈ امپائر کو آگاہ کریں گے۔

انٹرنیشنل کرکٹ کونسل کا کہنا ہے کہ فیلڈ امپائر تھرڈ امپائر کے حکم کے بغیر فرنٹ فٹ نوبال نہیں دے سکے گا،لیکن اگر کیمرے دستیاب نہیں ہوں تو فیصلہ آن فیلڈ امپائرکریں گے۔

انٹرنیشنل کرکٹ کونسل  نے  پاکستان اور انگلینڈ کے درمیان  ون ڈے سیریز میں  نیا تجربہ کرنے کا فیصلہ کیا ہے  ۔

آئی سی سی امپائرز اینڈ ریفریز منیجر ایڈرائن گرفتھ نے اس حوالے سے کہاکہ فی الحال اس نئے طریقہ کار کی آزمائش ہو رہی ہے، سیریز کے اختتام پر نتائج کرکٹ کمیٹی کو بھیجے جائیں گے جو جائزہ لے کر مستقبل میں عملدرآمد کے حوالے سے اپنی رائے دے گی۔

واضح  رہے کہ  رواں برس فروری میں نیوزی لینڈ کے خلاف ایڈم ووجس  کو  7 رنز پر  امپائر رچرڈ النگورتھ نے ناٹ آؤٹ قرار دیاتھا  ،   ری پلیز میں صاف دکھائی دیا کہ نوبال کی کال غلط تھی، بعد میں ووجس نے 239 رنز کی اننگز کھیلی تھی۔