قومی خواتین کرکٹ ٹیم کی سینئر کھلاڑی جویریہ خان نے آئی سی سی ویمنز گلوبل ڈویلمپنٹ اسکواڈ کی کپتانی کو مفید تجربہ قرار دیا ہے۔

جویریہ خان آئی سی سی ویمنز گلوبل ڈویلمپنٹ اسکواڈ کی کپتان اور مینٹور تھیں۔

جویریہ خان نے سیریز کے دوران بہترین کارکردگی کا مظاہرہ کیا، جس میں ان کی سرے اسٹارز کے خلاف 59 گیندوں پر 64 رنز کی اننگز نمایاں ہے جبکہ سرے اسٹارز کے خلاف دوسرے میچ میں 35 گیندوں پر 40 رنز بنائے اور انہوں نے اسی میچ میں 19 رنز دے کر 2 کھلاڑیوں کو آؤٹ بھی کیا تھا۔

اس موقع پر جویریہ خان کا کہنا ہے کہ مختلف کنڈیشنز میں جا کر ایک نئی ٹیم کی قیادت کرنابہترین تجربہ رہا جبکہ اس سیریز سے بہت کچھ سیکھنے کا موقع ملا ہے۔

جویریہ خان نےکہا کہ ایونٹ میں ٹیم کی قیادت کرنا آسان نہیں تھا، اسکواڈ میں شامل تمام کرکٹرز سیریز کے آغاز سے محض ایک روز قبل اکٹھی ہوئی تھیں تاہم ٹیم منیجمنٹ کی مدد سے جلد ہی تمام کھلاڑی ایک پیج پر آچکی تھیں۔

جویریہ خان کا کہنا تھا کہ آئندہ چند مہینوں میں قومی اور بین االاقوامی سطح پر بہت کرکٹ کھیلنی ہے جس کی تیاری کا آغاز کردیا ہے، امید ہے انگلینڈ سے حاصل ہونے والا تجربہ مفید رہے گا۔

جویریہ خان کا کہنا ہے کہ پاکستان کرکٹ بورڈ کی نئی منیجمنٹ قومی خواتین کرکٹ کے فروغ میں خاص دلچسپی رکھتی ہے جس کی ایک مثال ہائی پرفارمنس سنٹر کراچی میں بہتر سہولیات کے ساتھ ساتھ ٹرینرز اور کوچز کی موجودگی ہے۔