پاکستان کرکٹ ٹیم  کے کپتان سرفرازاحمد کا کہنا ہے کہ پاکستان میں کرکٹ کھیلنا  اور اپنے ہوم گراؤنڈ میں ٹیم کی قیادت کرنا خوش قسمتی کی بات ہے۔

تفصیلات کے مطابق کپتان سرفراز احمد نے نیشنل اسٹیدیم کراچی میں پریس کانفرنس کرتے ہوئے کہا کہ پی سی بی نے انٹرنیشنل کرکٹ کی بحالی کے لیے محنت کی، شائقین کرکٹ کھیل سے بھرپورلطف اندوز ہوں گے۔

سرفرازاحمد نے کہا کہ ہوم گراؤنڈ میں کپتان کی حیثیت سے میری پہلی سیریزہوگی، کوشش ہوگی ٹیم میں پانچویں نمبرپربیٹنگ کروں۔

سرفرازاحمد نے یہ بھی کہا کہ کپتانی کی مدت کے اعلان سے کوئی فرق نہیں پڑتا، پاکستان میں کرکٹ کھیلنا خوش قسمتی کی بات ہے، کراچی کے کراؤڈ نے ہمیشہ کرکٹ کوسپورٹ کیا ہے۔

سرفرازاحمد نے کانفرنس میں امید ظاہر کی کہ وہ ہیڈ کوچ اور چیف سلیکٹر مصباح الحق کو مایوس نہیں کریں گے،انھوں نے کہا کہ مصباح الحق نے کافی اعتماد دیا ہے جبکہ بابراعظم بھی ایک باصلاحیت کھلاڑی ہے۔

کپتان سرفرازکا کہنا تھا کہ ٹیم میں محمد رضوان کا اپنا رول ہے اورمیرا الگ رول ہے، یہ بورڈ کا فیصلہ ہے کہ کتنی سیریز کے لئے کپتان رکھتے ہیں۔

سرفراز احمد کا یہ بھی کہنا تھا کہ عمراکمل ابھی اسکواڈ کا حصہ نہیں ہیں جبکہ عابد علی ٹیم کاحصہ ہے،جہاں ضرورت ہو وہاں استعمال کریں گے۔

کرکٹ ٹیم کے کپتان سرفراز احمد نے مزید کہا کہ بیسٹ پاسیبل ٹیم  میدان میں اتاریں گے، سری لنکا سے اچھا مقابلہ ہوگا۔

اس موقع پرسری لنکن کپتان لہیرو تھریما نے پریس کانفرنس کرتے ہوئے کہاں کہ ہم نے کل ہوٹل میں ان ڈور گیمز کھیلے سیکیورٹی بہترین ہے، سینیئرزنہیں آئے لیکن ہم اپنا سو فیصد دیں گے۔

لہیرو تھریما نے کہا کہ پہلی بار پاکستان آکر بہت پر جوش ہوں،میں سب  سے کہوں گا کہ پاکستان آئیں اور کھیلیں۔

سری لنکن کپتان لہیرو تھریما نے مزید کہا کہ پاکستان کی پوری ٹیم ہی مضبوط ہے ،کوئی ایک کھلاڑی  بھی کھیل کا پانسہ پلٹ سکتا ہے۔