قومی ویمن کرکٹ ٹیم کی کپتان بسمہ معروف کا کہنا ہے کہ بنگلہ دیش ویمن ٹیم کی پاکستان آمد خوش آئند  بات ہے۔

لاہور کے قذافی اسٹیڈیم میں پریس کانفرنس کرتے ہوئے قومی ٹیم کی کپتان بسمہ معروف کا کہنا تھا کہ بنگلہ دیش کی ٹیم ایشین چیمپئن ہے اس سے  مقابلہ سخت ہوگا۔

بسمہ معروف نے کہا کہ پاکستان میں بین الاقوامی سیریز کا انعقاد بہت ضروری ہے،ہم زیادہ سے زیادہ میچز کھیلنا چاہتے ہیں تاکہ  ہماری رینکنگ مزید بہتر ہو۔

انہوں نے مزید کہا کہ بیٹنگ اور باؤلنگ دونوں شعبوں کو ترجیح دی جائے گی  جبکہ سابق کپتان ثنا میر پہلے میچ میں ٹیم کا حصہ نہیں ہوں گی۔

بسمہ معروف کا کہنا تھا کہ ابھی بیک اپ کھلاڑیوں کی کمی ہے،کوشش ہے کہ کھلاڑیوں کا ڈومیسٹک کرکٹ سے بیک اپ تیار کیا جائے۔ ہمیں اپنی ٹیم میں بہتری لے کر آنی ہے۔

ندا ڈار کے حوالے سے بات کرتے ہوئے بسمہ معروف نے کہا کہ اچھی بات ہے ندا ڈار بگ بیش لیگ کھیلنے گئی ہیں تاہم ملکی کرکٹ کو پہلی ترجیح دینی چاہیئے۔

دوسری جانب بنگلہ دیشی ویمن کرکٹ ٹیم کی کپتان سلمہ خاتون کاپریس کانفرنس میں کہنا تھا پاکستان کرکٹ بورڈ کے مشکور ہیں کہ انہوں نےہمیں مدعو کیا۔ہم پاکستان میں کھیلنے  کے لیےپرجوش ہیں۔

سلمہ خاتون کا کہنا تھا کہ پاکستان کے خلاف سیریز ورلڈ کپ کے لیےمددگار ثابت ہوگی۔ہم یہ سیریز جیت کر اپنی رینکنگ بہتر کرنے کی کوشش کریں گے۔

انہوں نے مزید کہا کہ پاکستان کا شمار ایشیا کے بہترین ممالک میں ہوتا ہے،امید ہے ویمن سیریز سے دو طرفہ تعلقات میں  بھی بہتری آئے گی۔