اسلام آباد یونائیٹڈ نے پاکستان سپر لیگ(پی ایس ایل) کے اگلے سیزن سے قبل بڑا قدم اٹھاتے ہوئے آسٹریلیا سے تعلق رکھنے والے ہیڈ کوچ ڈین جونز کو عہدے سے ہٹا دیا ہے۔

تفصیلات کے مطابق سابق آسٹریلین آل راؤنڈ ڈین جونز نے ٹوئٹر پر اپنے ویڈیو پیغام میں کہا کہ اسلام آباد یونائیٹڈ کے مالکان سے گفتگو کے بعد انہوں نے اگلے سیزن میں نئے کوچ کے ساتھ جانے کا فیصلہ کیا ہے۔

اسلام آباد یونائیٹڈ کے آفیشل ٹویٹر اکاؤنٹ سے ڈین جونز کی خدمات پر ان کا شکریہ ادا کیا گیا اور مستقبل کیلئے نیک خواہشات کا اظہار بھی کیا گیا۔

@IsbUnited @thePSLt20
Big news! pic.twitter.com/y1MgW3Ue0N

Advertisement

— Dean Jones AM (@ProfDeano) November 6, 2019

اپنے پیغام میں ڈین جونزکا کہنا تھا کہ یہ 4 سال بہت شاندار رہے، کئی نوجوان کھلاڑی اسلام آباد یونائیٹڈ کی جانب سے کھیلے اور پھر پاکستان کی نمائندگی کی اور ان کھلاڑیوں کی بدولت ہم نے چیمپیئن شپ جیتیں۔

آسٹریلیا کے ڈین جونز نے فیصلے پر مایوسی کا اظہار کرتے ہوئے کہا ہے کہ چار سال میں دو بار چیمپئن بنے پھر بھی ہٹا دیا گیا۔

ڈین جونز نے کہا کہ میں ریحان، حسان اور ڈیرن بیری سمیت تمام افراد کا بہت شکر گزار ہوں اور ہم اس دوران بہت لطف اندوز ہوئے۔

یاد رہے ڈین جونز پی ایس ایل کے افتتاحی ایڈیشن سے اسلام آباد یونائیٹڈ سے بطور ہیڈ کوچ منسلک تھے اور ان کی کوچنگ میں یونائیٹڈ نے پہلے ایڈیشن کے ساتھ ساتھ لیگ کے تیسرے ایڈیشن میں بھی چیمپیئن بننے کا اعزاز اپنے نام کیا تھا۔

اسلام آباد یونائیٹڈ کی جانب سے بھی ڈین جونز کو ہیڈ کوچ کے عہدے سے ہٹانے کی تائید کرتے ہوئے اعلامیہ جاری کردیا گیا ہے جس میں کہا گیا ہے کہ اسلام آباد یونائیٹڈ اور ڈین جونز نے راہیں جدا کر لیں۔

واضح رہے کہ اس حوالے سے کافی عرصے سے افواہیں زیر گردش تھیں کہ اسلام آباد یونائیٹڈ نے ڈین جونز کو کوچنگ سے ہٹانے کا فیصلہ کر لیا ہے تاہم فرنچائز کی جانب سے اب تک نئے نام کا اعلان نہیں کیا گیا۔