لیگ اسپنر یاسر شاہ کو قومی ٹیسٹ اسکواڈ سے ریلیز کرکے نیشنل کرکٹ اکیڈمی لاہور میں رپورٹ کرنے کی ہدایت کردی گئی ہے۔

تفصیلات کے مطابق یاسر شاہ کو راولپنڈی میں جاری ٹیسٹ میچ  کے  دوران اسکواڈ سے ریلیز کرکے نیشنل کرکٹ اکیڈمی لاہور رپورٹ کرنے کی ہدایت کردی گئی ہے۔

اس دوران وہ  نیشنل کرکٹ اکیڈمی لاہور کے اسپن باؤلنگ کنسلٹنٹ مشتاق احمد کی زیرنگرانی تربیت حاصل کریں گے۔

یاسر شاہ 16 دسمبر کو قومی کرکٹ ٹیم کو کراچی میں دوبارہ جوائن کرلیں گے۔ جہاں پاکستان اور سری لنکا کے درمیان دوسرا ٹیسٹ میچ 19 دسمبر سے نیشنل اسٹیڈیم میں کھیلا جائے گا۔

واضح رہے کہ سابق ٹیسٹ اسپنر مشتاق احمد   کی گزشتہ ہفتے اسپن باؤلنگ کنسلٹنٹ کی حیثیت سے تقرری کی گئی تھی۔

معاہدے کے مطابق مشتاق احمد 120 روز پر مشتمل اسائنمنٹ میں ڈومیسٹک باؤلرز کے ساتھ ساتھ انڈر 16 اور انڈر 19باؤلرز کے ساتھ بھی کام کریں گے۔

اس کے علاوہ ضرورت پڑنے پر مشتاق احمد قومی کرکٹ ٹیم کو بھی دستیاب ہوں گے۔

یاد رہے کہ  یاسر شاہ راولپنڈی میں جاری پہلے ٹیسٹ میچ کی پلیئنگ الیون میں شامل نہیں  ہیں۔ ٹیم مینجمنٹ نے پچ کی کنڈیشنز کو دیکھتے ہوئے چار فاسٹ بالرز کو کھلانے کا فیصلہ کیا ہے۔