مایہ ناز آل راؤنڈر و سابق کپتان محمد حفیظ نے ٹی ٹوئنٹی ورلڈکپ کے بعد کرکٹ سے ریٹائرمنٹ کا اعلان کردیا۔

لاہور میں پریس کانفرنس کرتے ہوئے ہوئے سابق کپتان محمد حفیظ  نے کہا کہ وہ ٹی ٹوئنٹی ورلڈ کپ کے بعد تمام طرز کی انٹرنیشنل کرکٹ سے ریٹائرمنٹ لے لیں گے۔

انہوں نے کہا کہ میں باعزت طریقے سے کرکٹ چھوڑنا چاہتا ہوں۔ریٹائرمنٹ لینے سے قبل ٹی ٹوئنٹی ورلڈ کپ تک پاکستان کی نمائندگی کرنا چاہتا ہوں۔

محمد حفیظ نے قومی ٹی ٹوئنٹی ٹیم  میں واپسی پر اظہار خیال کرتے ہوئے کہا کہ میں اپنی سلیکشن پر مشاورت میں شامل نہیں تھا  تاہم اپنی سلیکشن پر حیرانی نہیں ہوئی ،میرے لیے خوشی ہے  کہ لاہور میں پاکستان کی نمائندگی کررہا ہوں۔

انہوں نے کہا کہ ایک طویل عرصے سے ہوم گراؤنڈ میں کوئی سیریز نہیں  کھیلی ، کوشش ہوگی کہ ٹیم وننگ ٹریک پر واپس آ جائے۔

شعیب ملک اور محمد حفیظ کی ٹیم میں واپسی، سرفراز جگہ بنانے میں ناکام

سابق کپتان نے کہا کہ بنگلہ دیش ٹیم کا پاکستان آنا خوش آئند ہے۔ بنگلہ دیش ٹیم کو خوش آمدید کہتا ہوں کہ وہ پاکستان آرہے ہیں ۔

آل راؤنڈر کا مزید کہنا تھا کہ میں  کبھی خوف میں رہ کر نہیں کھیلتا، ہمیشہ مثبت کھیلتا ہوں۔ میری کوشش ہے اپنی فارم اور فٹنس بہتر کروں۔

بالنگ ایکشن کے حوالے سے محمد حفیظ نے کہا کہ بالنگ کو مس ضرور کرونگا۔ میں کچھ دنوں میں دوبارہ بالنگ ٹیسٹ دوں گا اور امید ہے کہ اس میں کامیاب ہوجاؤں گا۔

بھارتی کرکٹ بورڈ نے دھونی سے نظریں چرا لیں

موجودہ ٹی ٹوئنٹی  کپتان بابر اعظم کے حوالے سے ان کا کہنا تھا کہ بابر اعظم بہترین بلے باز ہے،  میری مکمل سپورٹ اس کے ساتھ ہے۔ چاہتا ہوں کہ وہ طویل عرصے تک ٹیم کی کپتانی کریں۔انہیں جہاں ضرورت پیش آئی ان کا ساتھ دوں گا۔

واضح رہے کہ گذشتہ روز بنگلہ دیش کے خلاف ٹی ٹوئنٹی سیریز کے لیے قومی اسکواڈ کا اعلان کیا گیا ہےجس میں دو سینئر کھلاڑیوں محمد حفیظ اور شعیب ملک کی واپسی ہوئی ہے۔