پاکستان انڈر19 ٹیم نے آئی سی سی انڈر 19 کرکٹ ورلڈ کپ 2020میں تیسری پوزیشن حاصل کرلی۔

جنوبی افریقہ کے شہر بینونی میں انڈر 19   کرکٹ ورلڈ کپ میں پاکستان اور نیوزی لینڈ کے درمیان تیسری پوزیشن کے فیصلے کے لیے شیڈول میچ بارش کی نذر ہوگیا۔

شدید بارش  کے باعث دونوں ٹیموں کے درمیان میچ ٹاس کیے بغیر ہی منسوخ کردیا گیا۔

گروپ مرحلے میں بہتر پوائنٹس کی بنیاد پر پاکستان ٹیم نے تیسری پوزیشن حاصل کر لی۔گروپ مرحلے میں پاکستان کے پوائنٹس کی تعداد 5  جبکہ نیوزی لینڈ کے پوائنٹس کی تعداد 3 تھی۔

 ایونٹ کے گروپ مرحلے میں پاکستان نے اسکاٹ لینڈ اور زمبابوے کو شکست دی تھی جب کہ بنگلہ دیش کے خلاف میچ  بھی بارش کی نذر ہوگیا تھا اور دونوں ٹیموں کو ایک ایک پوائنٹ دیاگیاتھا۔

ایونٹ کے کوارٹر فائنل میں افغانستان کی ٹیم کو شکست دینے والی قومی انڈر 19 ٹیم کو سیمی فائنل میں بھارت سے شکست کا سامنا کرنا پڑا تھا۔

دوسرے سیمی فائنل میں بنگلہ دیش نے نیوزی لینڈ  کو شکست دے کر انڈر 19 ورلڈ کپ کی تاریخ میں پہلی مرتبہ فائنل کے لیے کوالیفائی کیا ہے۔

پاکستان کی جانب سے مڈل آرڈر بلے با زمحمد حارث 5 میچوں کی3 اننگز میں 131 رنز بناکر سب سے بہترین بلے باز  رہے جبکہ محمد عباس آفریدی 5 میچوں میں 9 وکٹیں حاصل کرکے  سب سے کامیاب بالر رہے۔

واضح رہے کہ آئی سی سی انڈر 19 ورلڈکپ کا فائنل بھارت اور بنگلہ دیش کی ٹیموں کے درمیان کل 9 فروری (اتوار) کو پوچیفسٹروم میں کھیلا جائے گا۔