سری لنکا سے تعلق رکھنے والے لیجنڈری وکٹ کیپر بیٹسمین کمار سنگاکارا کا کہنا ہے کہ وہ بین الاقوامی کرکٹ ٹیموں کی پاکستان آمد دیکھنے کے خواہشمند ہیں۔

ان خیالات کا اظہار عظیم کرکٹر  نے لاہور میں گزرےوقت، ایم سی سی کے دورہ پاکستان اور 4 روزہ ٹیسٹ کی تجویز سے متعلق پی سی بی پوڈ کاسٹ میں  کیا۔

پی سی بی پوڈ کاسٹ سے خصوصی گفتگو کرتے ہوئے کمار سنگاکارا کا کہنا تھا  کہ میں اپنے ساتھ پاکستانی عوام کی گرمجوشی، تماشائیوں کا شاندار استقبال اور لاہور کے سفر کی حسین یادیں  لے جارہا ہوں۔

صدر ایم سی سی کمار سنگاکاراکا کہنا تھا کہ وہ ایک بار پھر پاکستان آنے پر بہت خوش ہیں۔ انفرادی طور پر وہ 10 سال بعد پاکستان آئے جبکہ ایم سی سی ٹیم کو پاکستان آئے کئی دہائیاں گزر چکی ہیں۔

کمار سنگاکارا  نے کہا کہ یہاں آنے کا مقصد پاکستان میں بین الاقوامی کرکٹ کے لیے مستقل بنیادوں پر راہ ہموار کرنا ہے۔

انہوں نے مزید کہا کہ کسی بھی دورے کے دوران ہوٹل تک محدود رہنے کےبجائے شہر کے مختلف علاقوں کی سیر کرنا ہمیشہ خوشگوار لمحہ ہوتا ہے۔

Would love for international teams to consider coming to Pakistan – @KumarSanga2

PCB Podcast Episode 18: https://t.co/6fPtiYQVad pic.twitter.com/d6kCGTrxdx

— Pakistan Cricket (@TheRealPCB) February 20, 2020

صدر ایم سی سی نے کہا کہ دورہ لاہور کے دوران ان کی ٹیم متعدد بار جمخانہ گولف کورس گئی، اسکواڈ میں شامل کھلاڑیوں  نے وہاں کی مہمان نوازی کا بھرپور لطف اٹھایا۔

کمار سنگاکارا  نے کہا کہ وہ یہاں سے عوام کی گرمجوشی، تماشائیوں کے شاندار استقبال، کھلاڑیوں کے جوش اور شہر کی سیر سے متعلق خوشگوار یادیں اپنے ساتھ واپس لے جارہے ہیں۔

انہوں  نے کہا کہ وہ پاکستان میں بین الاقوامی کرکٹ کی مستقل بحالی کی غرض سے یہاں دیگر ممالک کی ٹیموں کو کھیلتا دیکھنا چاہتے ہیں۔

صدر ایم سی سی  نے کہا کہ انہیں یہاں کھیلے گئے تمام میچز اب بھی یاد ہیں۔ لاہور قلندرز کے خلاف وارم اپ میچ میں جس طرح 19ہزار شائقین کرکٹ اسٹیڈیم میں موجود تھے، انہیں دیکھنا بھی ایک یادگار لمحہ رہے گا۔

ایم سی سی کرکٹ ٹیم کے کپتان  نے کہا کہ وہ بخوبی جانتے ہیں کہ پاکستانی عوام کرکٹ سے کتنی محبت کرتی ہے۔

بارہ ہزار چار سو ٹیسٹ رنز بنانے والے سابق کرکٹر کمار سنگاکارا  نے کہا کہ پاکستان  نے ہمیشہ کرکٹ کو عظیم کھلاڑی دئیے ہیں۔

انہوں  نے کہا کہ یہ ملک کرکٹر پیدا کرتا ہے، یہاں سے بہت سے فاسٹ باؤلرز، اسپنرز، بیٹسمین اور وکٹ کیپرز دنیا کے  افق پر نمودار ہوئے ہیں اور اس دورے کے دوران بھی انہیں کچھ مختلف نہیں لگا۔

صدر ایم سی سی نے کہا کہ لاہور قلندرز،ملتان سلطانز، ناردرن اور شاہینز کے اسکواڈ میں بہترین کھلاڑیوں کے خلاف کھیل کر انہیں لطف آیا۔

چار روزہ ٹیسٹ کرکٹ کی تجویز سے متعلق جب صدر ایم سی سی سے پوچھا گیا تو انہوں  نے کہا کہ ٹیسٹ کرکٹ ان کا پسندیدہ فارمیٹ ہے  اور  وہ اسے پانچ روز تک محدود رکھنے کی حمایت کرتے ہیں ۔

سنگاکارانے مزید  کہا کہ مگر حقیقت ذرا مختلف ہےاور ہمیں یہ بھی دیکھنا چاہیے کہ ان دنوں کتنے ٹیسٹ میچ پانچویں روز تک جاتے ہیں اوریہ کہ پانچ روز کی کرکٹ دیکھنے کتنے لوگ اسٹیڈیمز کا رخ کرتے ہیں۔

پاکستان سپر لیگ، تاریخ کے آئینے میں

انہوں نے کہا کہ ٹیسٹ کرکٹ اب صرف بڑی ٹیموں تک محدود نہیں بلکہ چھوٹی ٹیموں کو بھی ٹیسٹ اسٹیٹس دیا جارہا ہے، اب ایسا نہیں ہوسکتا کہ چند ٹیمیں پانچ روزہ کرکٹ کھیلیں اور کچھ چار روزہ ٹیسٹ کرکٹ کھیلا کریں۔

صدر ایم سی سی نے کہا کہ چند ممالک میں کرکٹ کے مداحوں کی اوسط عمر 45 سال سے زائد ہے جو کہ حوصلہ افزاء نہیں ہے۔ ہمیں یہ کھیل نوجوانوں میں مقبول کرنے کے لیے سوچ و بچار کی ضرورت ہے۔

سنگاکارا نے کہا یہی وجہ ہے کہ ڈے اینڈ نائٹ ٹیسٹ سمیت ٹیسٹ کرکٹ میں جدت لانے کی کوششیں کی جارہی ہیں۔

انہوں نے مزید کہا کہ یہ ایک ایسی بحث ہے جو مزید کچھ عرصہ جاری رہے گی مگر جو بھی ہو ہمیں اس کے عملی طور پر درست اور بہترین نتائج ڈھونڈنے ہیں۔

واضح رہے کہ لیجنڈری کرکٹر اور صدر ایم سی سی کمار سنگاکارا  نے 4 میچوں پر مشتمل سیریز کے سلسلے میں پاکستان کے دورے پر آئی ایم سی سی کرکٹ ٹیم کی قیادت کی تھی۔

تیرہ فروری کو لاہور پہنچنے والی ایم سی سی کرکٹ ٹیم کے دورہ میں تین ٹی ٹوئنٹی اور ایک پچاس اوورز پر مشتمل میچ شامل  تھا۔اس کے علاوہ اسکواڈ میں شامل کھلاڑیوں  نے گولف کھیلی، شاہی قلعہ کا دورہ کیا اور شہر کے مختلف مقامات پر کھانے بھی کھائے۔