انڈر 19 کرکٹ ورلڈ کپ 2020   کے پہلے سیمی فائنل میں بھارت نے پاکستان کو 10 وکٹوں سے شکست دے دی۔

پوچیفسٹروم میں کھیلے گئے انڈر 19 کرکٹ ورلڈ کپ کے پہلے سیمی فائنل میں  بھارت نے 173 رنز کا  ہدف با آسانی 36 ویں اوور میں بغیر کسی نقصان کے حاصل کرلیا۔

بھارت کی جانب سے یاشاسوی جیسوال نے 105 اور دویانش سکسینا نے 59  رنز کی ناقابل شکست اننگز کھیلی۔

اس سے قبل پاکستان نے ٹاس جیت کر پہلے بیٹنگ کرنے کا فیصلہ کیا تو دوسرے ہی اوور میں گذشتہ میچ کے ہیرو محمد ہریرا 4 رنز بناکر پویلین لوٹ گئے۔

نویں اوور میں 34 کے مجموعی اسکور پر فہد منیر 16 گیندوں پر بغیر کوئی رن بنائے وکٹ گنوا بیٹھے۔ اس موقع پر کپتان روحیل نذیر اور اوپنر حیدر علی نے ٹیم کو سہارا دیا اور 52 رنز کی شراکت قائم کی۔

تاہم اس موقع پر حیدر علی نصف سنچری اسکور کرکے روحیل نذیر کا ساتھ چھوڑ گئے اور پھر یکے بعد دیگرے وکٹیں گرتی ہی گئیں۔

بنگلہ دیش کرکٹ بورڈ کا پاکستان کے خلاف ٹیسٹ اسکواڈ کا اعلان

قاسم اکرم 9 رنز بناکر چلتے بنے۔محمد حارث نے 21 رنز بناکر کچھ مزاحمت کی لیکن وہ بھی کپتان کا زیادہ دیر ساتھ نہ دے سکے اور 156 کے مجموعی اسکور پر پویلین لوٹ گئے۔

کپتان روحیل نذیر 62 رنز بناکر آؤٹ ہوئے۔عرفان خان 3، عباس آفریدی اور طاہر حسین2، 2 جبکہ عامر علی 1 رن بنا سکے۔

پاکستان کی پوری ٹیم 44ویں اوور میں 172 رنز بنا کر آل آؤٹ ہوگئی۔

بھارت کی جانب سے سشانت مشرا نے 3، کارتک تیاگی اور روی بشنوئی نے 2،2 جبکہ انکولیکر اور جیسوال نے ایک ایک وکٹ حاصل کی۔

یاشاسوی جیسوال  کو ناقابل شکست شاندار سنچری اسکور کرنے پر میچ کا بہترین کھلاڑی قرار دیا گیا۔

اب پاکستان کا مقابلہ دوسرے سیمی فائنل کی شکست خوردہ ٹیم سے  تیسری پوزیشن کے لیے ہوگا ۔