صدر مملکت نے بنگلہ دیش اور پاکستان کی کرکٹ ٹیموں کے لئے دونوں ٹیموں کیلئے نیک خواہشات کا اظہار کرتے ہوئے کہا کہ امید ہےکہ دونوں ٹیمیں عمدہ ترین کھیل پیش کریں گی۔

تفصیلات کے مطابق بنگلہ دیش اور پاکستان کی کرکٹ ٹیموں نے جمعرات کو ایوان صدر کا دورہ کیا اور صدر مملکت ڈاکٹر عارف علوی سے ملاقات کی۔

اس موقع پر صدر مملکت نے دونوں ٹیموں کی حوصلہ افزائی کی جبکہ مہمان ٹیم کو پاکستان آمد پر خوش آمدید کہا۔

 صدر مملکت نے ملاقات میں کہا کہ بچپن سے کرکٹ کا شوقین رہا ہوں، پاکستان میں کرکٹرز کو ہیروز کا درجہ دیا جاتا ہے۔

  ڈاکٹر عارف علوی نے یہ بھی کہا کہ پاکستان میں انٹرنیشنل کرکٹ کی بحالی  خوش آئند ہے، امید کا اظہار کہ دونوں ٹیمیں عمدہ ترین کھیل پیش کریں گی۔

صدر مملکت ڈاکٹر عارف علوی نے مزید کہا کہ پاکستان ایک خوبصورت اور مہمان نواز ملک ہے، امید ہےکہ مہمان ٹیم کا دورہ خوشگوار رہے گا۔

 ملاقات میں بین الصوبائی رابطہ کی وفاقی وزیر ڈاکٹر فہمیدہ مرزا، پاکستان کرکٹ بورڈ کے چیئرمین احسان مانی اور ہیڈ کوچ مصباح الحق بھی شریک ہوئے۔

ملک کو صحت مند بنانے کیلئے ذمہ داری کا مظاہرہ کرنا چاہئے، صدرمملکت

واضح رہے کہ اس سے قبل بھی اسلام  آباد میں غذائیت سے متعلق قومی کانفرنس سے خطاب کرتے ہوئے صدرمملکت ڈاکٹر عارف علوی نے کہا تھا کہ بچوں کی نشو ونما پاکستان کا ایک بڑا مسئلہ ہے اوروزیراعظم عمران خان نے بھی اپنے خطاب میں اس حوالے سے قوم کو آگاہی دی ہے۔

  اپنے بیان میں صدرمملکت نے یہ بھی  کہا  تھا کہ قوموں کی تعمیر میں مثبت سوچ ، منصوبہ بندی اور وسائل کا درست استعمال ضروری ہے جبکہ بچوں کا مستقبل محفوظ بنانے کیلئے جامع پالیسی سازی کی ضرورت ہے۔

ڈاکٹر عارف علوی نے مزید کہا  تھا کہ غذایت کے مسائل سے نمٹنے کےلئے غذایت سے متعلق طریقہ کار وضع کرنے اور اس پر عملدرآمد یقینی بنانا انتہائی اہمیت کا حامل ہے۔