شائقین کرکٹ کا انتظار ختم ، پاکستان میں کرکٹ کے سب سے بڑے میلے پاکستان سپر لیگ ( پی ایس ایل 2020) کی افتتاحی تقریب کا آغاز ہوگیا۔

تفصیلات کے مطابق پی ایس ایل کی کراچی میں ہونے والی پہلی افتتاحی تقریب کے لیے نیشنل اسٹیڈیم اور اطراف کو برقی قمقموں سے سجایا گیا اور شہر قائد کی سڑکوں پر جگہ جگہ پاکستانی پرچم اور ملکی و غیر ملکی کھلاڑیوں کے پوسٹرز آویزاں کیے گئے ۔

پاکستان سپر لیگ کے پانچویں ایڈیشن کی پر رونق افتتاحی تقریب میں راحت فتح علی خان، سجاد علی، ابرار الحق، صنم ماروی  ،آئمہ بیگ ،ابو محمد،فرید ایاز اور سوچ بینڈ   سمیت 350 فنکار اپنے فن کا مظاہرہ  کر رہے ہیں۔

pic.twitter.com/B5szm9p3Fx

— PakistanSuperLeague (@thePSLt20) February 20, 2020

تقریب میں راک، پاپ، بھنگڑا، فوک اور علاقائی موسیقی کا تڑکا  تقریب کو چار چاند لگا رہا ہے۔

پی ایس ایل کے آفیشل ترانے میں شامل چاروں گلوکار عارف لوہار، علی عظمت، عاصم اظہر اور ہارون بھی افتتاحی تقریب میں جلوہ گر   ہیں جبکہ شوبز سے تعلق رکھنے والی شخصیات  بھی  تقریب میں موجود ہیں۔

تقریب کے اختتام پہ شاندار آتش بازی کا بھی مظاہرہ کیا جائے گا۔ جسکے بعد دو مرتبہ کی چیمپئن اسلام آباد یونائیٹڈ اور دفاعی چیمپئن کوئٹہ گلیڈی ایٹرز کے درمیان اس سیزن کا افتتاحی میچ کھیلا جائے گا۔

یہاں یہ بات قابل ذکر ہے کہ یہ پہلا موقع ہے جب پاکستان سپر لیگ کی افتتاحی تقریب پاکستان میں ہو رہی ہے اور مکمل ایونٹ بھی پاکستان میں ہی کھیلا جائے گا۔