بھارت انڈین پریمئر لیگ ( آئی پی ایل ) کی خاطر ایشیا کپ 2020 کو سبوتاژ کرنے پر تل گیا ہے۔

ایک نجی ٹی وی کی رپورٹ کے مطابق  بھارتی کرکٹ بورڈ  ( بی سی سی آئی )اگست ستمبر میں اپنی لیگ  کے لیے جگہ نکالنے کی خاطر ایشیا کپ 2020 کو موخر کرا سکتا ہے۔

بھارتی کرکٹ بورڈ  کورونا وائرس  کے سبب آئی پی ایل کو 15 اپریل تک ملتوی کرچکا  ہے تاہم وائرس کی وجہ سے رواں ماہ بھی انعقاد ہوتا دکھائی نہیں دے رہا،اسی لیے بی سی سی آئی نے اپنی لیگ  کے لیے اگست ستمبر کی ونڈو استعمال کرنے پر غور شروع کردیا ہے۔

اس  کے لیے  ستمبر میں ہی شیڈول ایشیا کپ کو بھی اگلی تاریخ تک موخر بھی کرایا جاسکتا ہے۔

ستمبر میں ایشیا کپ کے علاوہ بھارت کی انگلینڈ سے 3 ون ڈے اور اتنے ہی ٹوئنٹی 20 میچز کی سیریز بھی شیڈول ہے جبکہ کچھ دوسری ٹیموں کی بھی انٹرنیشنل سیریز ہیں  تاہم آسٹریلوی ٹیم اگست ستمبر میں فارغ ہوگی۔

بی سی سی آئی کے ایک آفیشل نے تصدیق کی کہ آئی پی ایل اگر اپریل میں منعقد نہیں ہوسکی تو اس کے اگست ستمبر میں انعقاد کا آپشن موجود ہے۔

جنوبی افریقی کرکٹ بورڈ کا کورونا کے باوجود کھلاڑیوں کی تنخواہ نہ کاٹنے کا فیصلہ

یاد رہے کہ اس بار ایشیا کپ کی میزبانی پاکستان کوکرنا ہے۔

اس حوالے سے پی سی بی کے چیئرمین احسان مانی نے ایک بھارتی اخبار سے بات چیت میں واضح کیا کہ ایشیا کپ سے متعلق کوئی بھی فیصلہ نہیں ہوا، ہم نے تو ابھی میٹنگ تک کی تاریخ کا تعین نہیں کیا۔

انہوں نے مزید کہا کہ  ایشین کرکٹ کونسل صورتحال کا جائزہ لے رہی  ہے اور اس کے مطابق ہی عمل کرے گی۔

ادھر ایک اور ممبر بورڈ کے آفیشل کے حوالے سے رپورٹ میں کہا گیاکہ ایشیا کپ کے حوالے سے کوئی بھی فیصلہ اپریل کے آخر تک ہوسکتا ہے۔

اے سی سی اور اس کے ممبرز صورتحال پر نظر رکھے ہوئے ہیں، بہتری آنے پر ہی میٹنگ میں ایونٹ کے حوالے سے فیصلہ کیا جائے گا۔