دنیا بھر کی  طرح بھارت میں بھی کورونا وائرس کے سبب لاک ڈاؤ ن میں توسیع ہونے کے بعد  انڈین پریمیئر لیگ (آئی پی ایل ) کو غیر معینہ مدت  کے لیے ملتوی کردیا گیا ہے۔

بھارتی کرکٹ بورڈ (بی سی سی آئی) کے  مطابق انڈین پریمیئر لیگ (آئی پی ایل ) کو  لاک ڈوؤن میں توسیع کے سبب غیر معینہ مدت  کے لیے ملتوی کر دیا گیا  ہے اور فی الوقت اس  کے لیے نئی ونڈو پر غور بھی نہیں کیا جا سکا۔

یاد رہے کہ  کورونا وائرس کی وجہ سے 29مارچ کو شروع ہونے والا ٹورنامنٹ 15 اپریل تک ملتوی کیا گیا تھا ۔

بی سی سی  آئی نے اس وقت یہ جواز پیش کیا تھا کہ مرکزی حکومت نے عالمی وبا ءپر قابو پانے کی غرض سے بھارت  کے لیے تمام ویزے 15 اپریل تک معطل کر دیے ہیں  جس کی وجہ سے ایونٹ کے متعلق کوئی حتمی رائے نہیں دی جا سکتی۔

اگرچہ گذشتہ روز  بھارتی حکومت کی جانب سے نافذ کردہ 21 روزہ لاک ڈاؤن ختم ہو گیا تھا لیکن بھارتی وزیراعظم نے اس میں 3 مئی تک توسیع کر دی ہے۔

بھارتی کرکٹ بورڈ کے ذرائع نے موجودہ حالات کے تحت تصدیق کردی ہے کہ آئی پی ایل کو غیر معینہ مدت کے لیے ملتوی کر دیا گیاہے  اور فی الوقت اس  کے لیے نئی ونڈو پر غور بھی نہیں کیا جا سکا ہے۔

آئی پی ایل کے چیف آپریٹنگ آفیسر ہیمنگ امین نے ایونٹ کی تمام فرنچائز کو مطلع کردیا ہے کہ حکومت کی جانب سے لاک ڈاؤن میں 3 مئی تک توسیع کے بعد ممکن نہیں رہا کہ ٹورنامنٹ کا ریگولر سمر ونڈو میں انعقاد کرایا جا سکے۔

بی سی سی آئی کے صدر ساروگنگولی نے ٹیلی کانفرنس کے دوران سیکرٹری جے شاہ، آئی پی ایل کے چیئرمین برجیش پٹیل، خزانچی ارون دھومل اور ہیمنگ امین کی مشاورت سے ایونٹ کے التوا کا فیصلہ کیا۔