پاکستان کرکٹ بورڈ ( پی سی بی )کے چیف ایگزیکٹو وسیم خان کا کہنا ہے کہ قومی کرکٹ ٹیم کے کھلاڑیوں کے پاس دورہ انگلینڈ سے دستبرداری کا آپشن موجود ہے۔

تفصیلات کے مطابق پاکستان کرکٹ بورڈ(پی سی بی )کے چیف ایگزیکٹو وسیم خان اور ڈائریکٹر انٹرنیشنل کرکٹ ذاکر خان نے کھلاڑیوں کو دورہ انگلینڈ کے حوالے سے بریف کیا۔

ڈاکٹر سہیل سلیم اور  چیف سلیکٹر و ہیڈ کوچ  مصباح الحق  بھی بریفنگ میں  شریک تھے۔

چیف ایگزیکٹو وسیم خان نے   کہا کہ ریڈ اور وائٹ بال کے 25 کھلاڑیوں کو انگلینڈ لے کر جانے کا منصوبہ ہے۔ انہوں نے  کھلاڑیوں کو یقین دہانی کروائی کہ  ان کی صحت اور حفاظت پر کوئی سمجھوتہ نہیں کریں گے۔

بریفنگ میں کھلاڑیوں کو بتایا گیاکہ 25 کھلاڑی جولائی کے پہلے ہفتے میں انگلینڈ روانہ ہوں گے، جو دورے کے اختتام تک وہاں موجود رہیں گے۔

انٹرنیشنل کرکٹ کونسل کی گائیڈلائنز کے مطابق جون کے اوائل میں لاہور میں ٹریننگ سیشنز کے انعقاد کی منصوبہ بندی کررہے ہیں۔

ڈاکٹر سہیل سلیم، مصباح الحق اور وقار یونس حفظانِ صحت کے اصولوں کے مطابق کھلاڑیوں کے لیے ٹریننگ سیشنز ترتیب دیں گے۔

وسیم خان نے کہا کہ  پی سی بی کھلاڑیوں کو انگلینڈ بورڈ کے ساتھ مزید بات چیت کے حوالے سے بھی آگاہ کرتا رہے گا۔

چیف ایگزیکٹو پی سی بی نے کہا کہ  بظاہر آئندہ 3 ماہ پاکستان کرکٹ ٹیم کو بائیو سیکیور انتظامات میں رہنا پڑے گا۔کھلاڑیوں کے پاس دورے  سے دستبرداری کی آپشن موجود ہوگی۔

انہوں نے کہا کہ  حفاظتی اقدامات کے حوالے سے کھلاڑیوں کو مزید تفصیلات آئندہ چند ہفتوں میں فراہم کردی جائیں گی۔

ذاکر خان نے کہا کہ  ان غیرمعمولی حالات میں کھلاڑیوں کی لاہور میں ٹریننگ کے حوالے سے ہر طرح کے انتظامات کرنے کے لیے تیار ہیں۔

پی سی بی نے نئے سنٹرل کنٹریکٹ میں کھلاڑیوں کی فیملی کے ہمراہ انشورنس کو یقینی بنایا ہے۔