سری لنکا کی وزارت کھیل نے ورلڈ کپ 2011  فائنل کے مبینہ طور پر فکسڈ ہونے کے الزامات کی تحقیقات کا  آغاز کردیا ہے۔

تفصیلات کے مطابق  سری لنکا کے سابق وزیر کھیل مہندا نندا التوگماگے نے گذشتہ روز ایک انٹرویو میں کہا تھا کہ وہ پورے وثوق سے کہہ سکتے ہیں کہ 2011  میں سری لنکا اور بھارت کے درمیان کرکٹ ورلڈ کپ کا فائنل فکسڈ تھا۔

سابق وزیر کے بیان کے بعد سری لنکا کی وزارت کھیل کی جانب سے اسپیشل انویسٹی گیشن یونٹ میں ایک درخواست جمع کرادی گئی ہے جس میں ان الزامات کی باضابطہ تحقیقات کا کہا گیا ہے۔

سری لنکن ٹی وی کو انٹرویو میں سری لنکا کے سابق وزیر کھیل مہندا نندا التوگماگے کا کہنا تھا کہ وہ سال 2011 میں کھیلوں کے وزیر رہے ہیں، وہ یہ بات وثوق سے کہتے ہیں کہ 2011 کرکٹ ورلڈ کپ کا فائنل بیچا گیا تھا۔

بھارتی کھلاڑیو ں نے ایسے تمام الزامات کی سختی سے تردید کررکھی ہے۔

اس میچ کے بارے میں سابق کپتان رانا ٹنگا جو اس میچ کے دوران بحیثت کمنٹیٹر اسٹیڈیم میں موجود تھے،نے بھی سوالات اٹھائے تھے۔

ان کا کہنا تھا کہ جب ہم ہارے تھے تو میں شدید اضطراب میں تھا، مجھے لگتا ہے کہ کچھ غلط ہو ا تھا ، اس میچ کی تحقیقات کرائی جانی چاہیئں۔

یاد رہے کہ ممبئی میں کھیلے گئے ورلڈ کپ2011  کے فائنل میں بھارت نے سری لنکا کو 6 وکٹ سے شکست دے کر دوسری مرتبہ یہ ٹائٹل حاصل کیا تھا۔