سابق کپتان سرفراز احمد کا کہنا ہے کہ یونس خان کے آنے سے ٹیم کو بہت فرق پڑے گا۔

سابق کپتان سرفراز احمد  نے دورہ انگلینڈ  کے لیے اعلان کردہ اسکواڈ میں  واپسی کے بعد ویڈیو لنک  پریس کانفرنس کرتے ہوئے  کہا کہ انگلینڈ کا ٹور ہمیشہ مشکل ہوتا ہے   ، یونس خان کے آنے سے ٹیم کو بہت فرق پڑے گا۔

سرفراز احمد کا کہنا تھا کہ کپتانی کے ساتھ ساتھ اچانک تینوں فارمیٹ سے باہر ہوجانے پر بہت افسوس ہوا تھا لیکن کبھی مایوس نہیں ہوا، مجھے یقین تھا کہ ایک دن ضرور کم بیک کروں گا۔ موقع ملا تو ٹیم کے لئے اچھا کھیل پیش کرنے کی کوشش کروں گا۔

سابق کپتان نے تسلیم کیا کہ کپتانی کے دور میں ان سے کچھ غلطیاں ضرور سرزد ہوئیں تھیں جس کی وجہ سے انہیں باہر کیا گیا۔ٹیم سے باہر ہوا تو مسلسل کرکٹ کھیلتا رہا ، فارم بحال کی اور  فٹنس پر بھی محنت جاری رکھی ۔

انہوں نے مزید کہا کہ  کم بیک بلکل ڈیبیو کی طرح ہوتا ہے ،ٹیم میں کسی بھی نمبر پر کھیلنے کے لیے تیار ہوں ۔

سرفراز احمد نے کہا کہ  ڈبل سنچری بنانا ہر کھلاڑی کی خواہش ہوتی ہے ،موقع ملا تو لمبی اننگز کھیلوں گا ۔

سابق کپتان نے کہا کہ کورونا وباء کی صورتحال میں انگلینڈ جانے کے لیے کوئی دباؤ نہیں ،یہ فیصلہ تمام کھلاڑیوں کا اپنا فیصلہ ہے ۔ انگلینڈ کا دورہ طویل ہے اور کھلاڑیوں کی تعداد کے حساب سے کوچنگ اسٹاف بھی ترتیب دیا گیا ہے تاکہ کسی کھلاڑی کو مسئلہ پیش نہ آئے ۔