کورونا وائرس کی وباء کے سبب جہاں دنیا بھر میں لوگوں کے معمولات زندگی میں تبدیلی واقع ہوئی ہے  وہیں کھیلوں کی سرگرمیاں بھی اس سے متاثر ہوئی ہیں۔

اسی تناظر میں انٹرنیشنل کرکٹ کونسل ( آئی سی سی ) نے  کرکٹ قوانین میں چند بڑی تبدیلیاں کی ہیں جو بعض  ماہرین کے مطابق کرکٹ  مقابلوں میں عدم توازن کا پیش  خیمہ ثابت ہوسکتی ہیں۔

قوانین میں پہلی بڑی تبدیلی بال کو چمکانے کے لیے تھوک کے استعمال پر پابندی ہے۔

اگر کوئی کھلاڑی گیند پر تھوک لگاتا ہے تو  ابتداء میں  امپائرز کھلاڑیوں کی ایڈجسٹمنٹ کے ابتدائی دور میں کچھ نرمی کے ساتھ صورتحال کو سنبھال لیں گے ، لیکن اس کے نتیجے میں ٹیم کو انتباہ ملے گا۔

Advertisement

JUST IN: Interim changes to the ICC's playing regulations have been confirmed.

Full details👇 https://t.co/GfQ8l6Qyra pic.twitter.com/4cT2YpOaEO

— ICC (@ICC) June 9, 2020

ایک ٹیم کو  ایک اننگز میں دو بار متنبہ کیا جائے  گا لیکن گیند پر بار بار تھوک کے استعمال سے 5 رنز کا جرمانہ ہوگا۔

جب بھی گیند پر تھوک لگا کر چمکایا جائے گا تو   امپائرز کو ہدایت کی جائے گی کہ وہ کھیل کو دوبارہ شروع کرنے سے پہلے گیند کو اچھی طرح  صاف کریں۔

بعض سابق بالرز کا خیال ہے کہ ایسا کرنے سے بلے بازوں کو بالرز پر سبقت حاصل ہوگی کیونکہ بال نہ چمکانے سے اسے سوئنگ اور ریورس سوئنگ کرنا  تو تقریباً نا ممکن ہو جائےگا۔

دوسری اہم تبدیلی  ٹیسٹ میچ کے دوران پلیئنگ الیون میں شامل کسی بھی کھلاڑی میں کورونا وائرس کی علامات ظاہر ہونے پر اسے  اسکواڈ کے کسی دوسرے کھلاڑی سے تبدیل کیا جاسکے گا۔

میچ ریفری ایک جیسے کھلاڑیوں  مثلاً  فاسٹ بالر کی جگہ فاسٹ بالر  کو ہی ٹیم میں شامل کرنے کی منظوری دے گا۔ تاہم یہ قانون ون ڈے اورٹی ٹوئنٹی میں لاگو نہیں ہوگا۔

تیسری تبدیلی نیوٹرل امپائرز کی تقرری کا خاتمہ ہے۔ آئی سی سی نے  بین الاقوامی سفر کے ساتھ موجودہ لاجسٹک چیلنجوں کی وجہ سے غیر نیوٹرل امپائرز کی تقرری کے تقاضے کو تمام بین الاقوامی فارمیٹس سے عارضی طور پر ختم کردیا ہے۔

اس تبدیلی سے آئی سی سی ایلیٹ پینل آف میچ آفیشلز اور انٹرنیشنل پینل آف میچ آفیشلز سے مقامی سطح پر میچ کے عہدیدار مقرر کرسکے گی۔

آئی سی سی نے اس بات کو مد نظر رکھتے ہوئے کہ  نیوٹرل امپائرز کی غیر موجودگی میں کم تجربہ کار امپائرز فرائض انجام دیں گے ،میچ کی ہر اننگز میں ہر ٹیم کے لیے ایک اضافی ڈی آر ایس کی بھی تصدیق کی ہے ۔

اس اضافے کے بعد ہر ٹیم  کو ٹیسٹ میچ کی ہر اننگز میں تین جبکہ ون ڈے اور ٹی ٹوئنٹی میں دو ، دو ڈی آر ایس ملیں گے۔