ڈھاکہ: پاکستان نے بنگلادیش کو تیسرے ٹی ٹوئنٹی میچ میں بھی شکست دے دی ہے جبکہ اس سیریز میں شاہینوں نے کلین سوئپ کیا ہے۔

ڈھاکہ کے شیر بنگلا کرکٹ اسٹیڈیم میں جاری ٹی ٹوئنٹی سیریز کے تیسرے میچ میں بنگلادیش نے ٹاس جیت کر پہلے بیٹنگ کرتے ہوئے پاکستان کو جیت کے لیے 125 رنز کا ہدف دیا جسے پاکستان ٹیم نے آخری اوور کی آخری گیند پر سنسنی خیز مقابلے کے بعد پورا کرلیا ہے۔

پاکستان کی جانب سے حیدر علی نے سب سے زیادہ 38 گیندوں پر 45 رنز اسکور کیے جبکہ قومی ہیرو محمد رضوان نے 43 گیندوں پر 40 رنز اسکور کیے اور کپتان بابر اعظم نے 25 گیندوں پر 19 رنز بنائے۔

بنگلادیش کی جانب سے محمود اللہ نے 3 کھلاڑیوں کو آوٹ کیا جبکہ امین الاسلام اور شہید الاسلام نے 1،1 کھلاڑی کو آوٹ کیا۔

پہلی اننگ

بنگلادیش کی جانب سے محمد نعیم نے 50 گیندوں پر 47 رنز اسکور کیے جبکہ شمیم حسین 22، عاطف حسین 20 اور محمود اللہ نے 13 رنز اسکور کیے۔

پاکستان کی جانب سے محمد وسیم جونیئر نے اچھی بولنگ کرتے ہوئے 4 اوورز میں 5 رنز دے کر 2 کھلاڑیوں کا شکار کیا جبکہ عثمان قادر نے بھی 2 کھلاڑیوں کو پویلین کی راہ دکھائی۔

علاوہ ازیں اس میچ میں ڈیبیو کرنے والے شاہ نواز نے اپنے کیریئر کی پہلی وکٹ حاصل کی جبکہ حارث روف بھی ایک کھلاڑی کو آوٹ کرسکے۔

دوسری جانب قومی اسکواڈ میں آج 4 تبدیلیاں کی گئی تھیں جس میں سرفراز احمد، افتخار احمد، عثمان قادر اور شاہ نواز دھانی کو پلیئنگ الیون میں شامل کیا گیا تھا۔

واضح رہے کہ پاکستان ٹیم نے اس ٹی ٹوئنٹی سیریز میں کلین سوئپ کیا ہے جبکہ اس سے قبل کھیلے گئے دو میچز میں سے پہلے میچ میں پاکستان نے بنگلادیش کو سنسنی خیز مقابلے کے بعد 4 وکٹوں سے شکست دی تھی اور سیریز کے دوسرے میچ میں پاکستان نے باآسانی 8 وکٹوں سے کامیابی حاصل کی تھی۔

یاد رہے کہ قومی ٹی ٹونٹی اسکواڈ آج شام ساڑھے 6 بجے ڈھاکا سے بذریعہ دبئی وطن واپس روانہ ہوگا تاہم اسپنرز عماد وسیم اور عثمان قادر کچھ روز دبئی میں فیملیز کے ہمراہ قیام کے بعد وطن واپس روانہ ہوں گے۔

خیال رہے کہ پاکستان اور بنگلا دیش کے مابین پہلا ٹیسٹ میچ 26 نومبر سے چٹاگانگ میں کھیلا جائے گا جبکہ دوسرا اور آخری ٹیسٹ میچ 4 دسمبر سے ڈھاکہ میں کھیلا جائے گا۔