ڈھاکہ: شعیب ملک کی جگہ آج قومی اسکواڈ میں شاہ نواز دھانی کو کھلانے کا فیصلہ کیا گیا ہے۔

فاسٹ بولر شاہ نواز دھانی آج بنگلہ دیش کے خلاف تیسرے اور آخری ٹی ٹوئنٹی میں ڈبیو کریں گے، پی سی  بی نے انہیں پلیئنگ الیون کا حصہ بناننے کی تصدیق کرتےہوئے ایک ویڈیو بھی جاری کی ہے جس میں وہ اپنی والدہ ہ کو میچ کھیلنے کی نوید سناکر دعائیں لےرہے ہیں۔

لاڑکانہ سے تعلق رکھنے والے دھانی  پاکستان کے پچانوے اور لاڑکانہ کے پہلے کھلاڑی ہیں جو ٹی ٹوئنٹی میں پاکستان کی نمائندگی کا اعزاز حاصل کریں گے۔

اس موقع پر شاہ نواز دھانی کا کہنا ہے کہ پاکستان کی طرف سے کھیلنا ہر کھلاڑی کی خواہش ہوتی ہے، جب سے میچ کھییلنے کا سنا ہے تو رات بھر نیند نہیں آئی۔

دھانی نے شین بونڈ کو اپنا فیورٹ بولر قرار دیتے ہوئے کہا کہ اب تک پی ایس ایل کا بہترین بولربننا میرے لیے یادگار لمحات ہیں اور ڈبیو میچ میں مین آف دی میچ بننے کی  خواہش ہے۔

دھانی کا مزید کہنا تھا کہ کھیتی باڑی سے  انٹرنیشنل میدان میں پاکستان کی طرف سے کھیلنے کا سفر بہت محنت طلب رہاہے، والدین سمیت سب نے بہت سپورٹ کیا۔

دھانی کا مزید کہنا تھا کہ اپنی سرزمین پر پہلا میچ کھیلنے کو ملتا تو زیادہ لطف آتا تاہم ملنے والے اس موقع میں بہترین پرفارمنس دے کر سب کے دل جیتنے کی کوشش کروں گا۔

واضح رہے کہ آج پاکستان اور بنگلادیش کے درمیان ٹی ٹوئنٹی سیریز کا تیسرا میچ سہہ پہر 1 بجے کھیلا جائے گا جبکہ اس سے قبل کھیلے گئے دو میچز میں پاکستان کو 2،0 سے برتری حاصل ہے۔

پہلے ٹی ٹوئنٹی میچ میں پاکستان نے بنگلادیش کو سنسنی خیز مقابلے کے بعد 4 وکٹوں سے شکست دی تھی جبکہ دوسرے میچ میں پاکستان نے باآسانی 8 وکٹوں سے کامیابی حاصل کی تھی۔