ایشز سیریز میں آسٹریلیا اور انگلیند کے درمیان پرتھ میں شیڈول پانچواں اور آخری ٹیسٹ مغربی آسٹریلیا میں سخت کووڈ پابندیوں کی وجہ سے تاحال مشکلات کا شکار ہے۔

پانچ سے نو جنوری تک شیڈول چوتھے ٹیسٹ کے بعد آسٹریلوی اور انگلش کھلاڑیوں اور اسٹاف کو پانچویں ٹیسٹ کےلئے سڈنی(نیو ساوتھ ویلز) سے پرتھ جانا ہوگا جو 14 جنوری کو شیڈول ہے۔

نیو ساوتھ ویلز سے مغربی آسٹریلیا جانے والے ہر مسافر کو دو ہفتوں کے ہوٹل کوارنٹائن پروگرام سے گزرنا لازم ہے اور موجوہ حالات میں ایشز سیریز میں شامل کسی بھی شخص کےلئے کوئی چھوٹ نہیں ہے۔

ایسے حالات میں اگر کرکٹ آسٹریلیا مسافر کھلاڑیوں کو 14 روزہ کوارنٹائن سے بچانا چاہتا ہے تو اس کے پاس پانچویں ٹیسٹ کےلئے دوسری ریاست کا انتخاب کرنے کا اختیار موجود ہے۔

مغربی آسٹریلیا کے پریمیئر مارک مک گوون نے اعلان کیا ہے کہ ایک بار ان کی ریاست کی 90 فیصد آبادی دوہری ویکسینیٹڈ ہوجائے تو وہ اپنی سرحدیں کھول دیں گے۔ تاہم یہ آخر جنوری اور شروع فروری سے قبل متوقع نہیں۔

نیو ساوتھ ویلز میں کووِڈ 19 کے کیسز میں کمی اور ویکسینیشن کی بڑھتی شرح کے باوجود ویسٹرن آسٹریلیا کی حکومت اپنے ضوابط سے پیچھے ہٹنے پر تیار نہیں ہے۔

بارڈر معاملے پر وفاقی وزیر صحت مارک ہنٹ اور مک گوون کے درمیان تناو ہے اور دونوں شخصیات اپنی ترجیحات سے پیچھے ہٹنے کو تیار نہیں ہیں۔