ڈھاکہ: پاکستان نے پہلے ٹی ٹوئنٹی میچ میں سنسنی خیز مقابلے کے بعد بنگلادیش کو 4 وکٹوں سے شکست دے دی ہے۔

تفصیلات کے مطابق ڈھاکہ کے شیر بنگلا کرکٹ اسٹیڈیم میں پاکستان اور بنگلادیش کے درمیان پہلا ٹی ٹوئنٹی میچ کھیلا گیا جس میں بنگلادیش نے ٹاس جیت کر پہلے بیٹنگ کرنے کا فیصلہ کیا۔

بنگلادیش کی پوری ٹیم نے مقررہ 20 اوورز میں 7 وکٹوں کے نقصان پر 127 رنز اسکور کیے اور پاکستان کو جیت کے لیے 128 رنز ہدف دیا جسے پاکستان نے سنسنی خیز مقابلے کے بعد اپنے نام کرلیا۔

پاکستان ٹیم نے 19 اعشاریہ 2 اوورز میں 6 کھلاڑیوں کے نقصان پر 132 رنز اسکور کیے اور یوں پاکستان نے بنگلادیش کو 4 وکٹوں سے شکست دے دی۔

پاکستان ٹیم کی بیٹنگ کا آغاز خاصی مایوس کن رہا اور تیسرے اوور کی چوتھی گیند پر محمد رضوان صرف 11 رنز بناکر پویلین لوٹ گئے جس کے بعد اگلے ہی اوور میں بابر اعظم بھی 7 رنز بناکر آوٹ ہوگئے۔

پاکستان ٹیم کی جانب سے فخر زمان اور خوشدل شاہ نے بہترین کھیل کا مظاہرہ کرتے ہوئے 35، 35 رنز اسکور کیے جبکہ میچ کے اختتام کو شاداب خان نے مزید دلسچپ بنادیا۔

شاداب خان نے محض 10 گیندوں پر 21 رنز اسکور کیے جس میں انہوں نے 2 چھکے اور 1 چوکا بھی مارا جو ٹیم کو کامیابی کی طرف لے گیا۔

بنگلادیش کی جانب سے تسکین احمد نے 2 کھلاڑیوں کو آوٹ کیا جبکہ مہدی حسن، مستفیظر رحمان اور شریف الاسلام نے 1، 1 کھلاڑی کو آوٹ کیا۔

پہلی اننگ

بنگلادیش کی جانب سے پہلی بیٹنگ کرتے ہوئے عاطف حسین 34 گیندوں پر 36 رنز بناکر نمایاں رہے جبکہ اس کے علاوہ نورالحسن نے 22 گیندوں پر 28 رنز اسکور کیے جبکہ مہدی حسن 20 گیندوں پر 30 رنز بناکر ناٹ آوٹ رہے۔

پاکستان کی جانب سے حسن علی نے 3 کھلاڑیوں کو آوٹ کیا اور محمد وسیم نے 2 کھلاڑیوں کو آوٹ کیا جبکہ شاداب خان، محمد نواز نے ایک ایک وکٹ حاصل کی۔

واضح رہے کہ سیریز کا دوسرا اور تیسرا ٹی ٹوئنٹی انٹرنیشنل میچ بھی بالترتیب 20 اور 22 نومبر کو اسی مقام پر کھیلا جائے گا۔

دورہ بنگلادیش کے دوران پاکستان ٹیم بنگلا دیش سے 2 ٹیسٹ میچز بھی کھیلے گی جس کا پہلا میچ 26 نومبر سے 30 نومبر کے درمیان کھیلا جائے گا۔

جبکہ ٹیسٹ سیریز کا دوسرا میچ 4 دسمبر سے شروع ہوگا جو 8 دسمبر تک جاری رہے گا۔