آئی سی سی نے انگلینڈ ٹیم پر پوری میچ فیس کا جرمانہ عائد کیا ہے جبکہ انگلینڈ کو ورلڈ ٹیسٹ چیمپئن شپ میں بھی بڑے دھچکے کا سامنا ہے۔

انگلینڈ اور آسٹریلیا کے درمیان ایشز سیریز جاری ہے جس کے پہلے میچ میں انگلینڈ کو شکست کا سامنا کرنا پڑا ہے جبکہ آئی سی سی نے اس میچ میں سست اوور پھینکنے پر میچ فیس کا پورا جرمانہ بھی عائد کیا ہے۔

آئی سی سی نے انگلینڈ پر اس میچ میں سست بالنگ کرانے کی وجہ سے 5 پوائنٹس کی بجائے 8 پوائنٹس کا بھی جرمانہ عائد کیا ہے جبکہ آئی سی سی نے اس سے قبل میچ فیس کا پورا اور ورلڈ ٹیسٹ چیمپئن شپ کے 5 پوائنٹس کے جرمانے کا اعلان کیا تھا۔

آئی سی سی کا کہنا تھا کہ انگلینڈ نے مقررہ وقت میں 8 اوورز کم پھینکے تھے جس کی وجہ سے انگلینڈ ٹیم کے 3 اضافی پوائنٹس کاٹے گئے ہیں۔

آئی سی سی کا کہنا تھا کہ پنالٹی اووروں کی کوئی حد نہیں ہے، آئی سی سی ضابطہ اخلاق کے آرٹیکل 16 اعشاریہ 1 اعشاریہ 12 کے مطابق مقررہ وقت میں پورا نہ کرنے والے اوورز کی تعداد کو ظاہر کرتا ہے۔

آئی سی سی کا کہنا تھا کہ اسی وجہ سے جتنے اوور کم تھے اسی حساب سے فی اوور ایک پوائنٹ کا جرمانہ لگایا گیا ہے۔

واضح رہے کہ انگلینڈ کی ٹیم اب تک 5 ٹیسٹ میچز کھیل چکی ہے جس میں اس کے 6 پوائنٹس ہیں جبکہ ٹیسٹ چیمپئن کا خطابی مقابلہ کھیلنے کے لیے پوائنٹس ٹیبل پر ٹاپ 2 میں رہنا ضروری ہے لیکن پوائنٹس ٹیبل پر انگلینڈ کی حالت انتہائی خراب نظر آرہی ہے۔

خیال رہے کہ آئی سی سی رولز کے مطابق جتنے اوور کم پھینکے جاتے ہیں اسی حساب سے میچ فیس کی بھی کٹوتی ہوتی ہے جبکہ ایک اوور پر میچ فیس کا 20 فیصد کاٹا جاتا ہے۔