ڈھاکہ ٹیسٹ میں بنگلادیش کی ٹیم کو اپنی گھومتی گیند سے چکرادینے والے ساجد خان اپنے کیریئر کا چوتھا ٹیسٹ میچ کھیل رہے ہیں۔

ڈھاکہ ٹیسٹ میں مرد میدان قرار دیے جانے والے ساجد خان کا تعلق پاکستان کے صوبہ خیبر پختونخوا سے ہے جبکہ انہوں نے اپنا ڈیبیو ٹیسٹ میچ زمبابوے کے خلاف 29 اپریل 2021 کو کھیلا۔

­­ساجد خان اپنے ٹیسٹ کیریئر میں اب تک 3 میچ کھیل چکے ہیں جبکہ ڈھاکہ ٹیسٹ ان کے کیریئر کا چوتھا میچ ہے، ساجد خان نے اپنے ٹیسٹ کیریئر میں اب تک 14 وکٹیں حاصل کی ہیں اور بیٹنگ میں انہیں صرف 3 اننگز میں موقع ملا جس میں انہوں نے 32 رنز اسکور کیے۔

ساجد خان اس سے قبل خیبر پختونخوا اور پشاور کی ٹیموں کی جانب سے بھی کھیل چکے ہیں جس میں ان کی کارکردگی کافی متاثر کن رہی جس کے باعث انہیں قومی ٹیم میں کھیلنے کا موقع ملا۔

کرکٹ انفو کے مطابق ساجد خان ڈومسٹک میچز میں اب تک 63 میچز کھیل چکے ہیں جس میں انہوں نے 172 وکٹیں حاصل کی ہیں جبکہ وہ ڈومسٹک کرکٹ میں 1 ہزار 318 رنز بھی اسکور کرچکے ہیں۔

اس سے قبل 26 نومبر سے کھیلے گئے چٹاگانگ ٹیسٹ میں ساجد خان نے 4 کھلاڑیوں کو آؤٹ کیا تھا۔

علاوہ ازیں ڈھاکہ ٹیسٹ میں 8 وکٹیں حاصل کرکے ساجد خان پاکستان کے دوسرے 8 وکٹیں لینے والے آف اسپنر بولر بن گئے ہیں جبکہ انہوں نے پاکستان ٹیم کے موجودہ عبوری ہیڈ کوچ ثقلین مشتاق کا ریکارڈ بھی برابر کردیا ہے۔

ڈھاکہ ٹیسٹ میں ساجد خان کی کارکردگی

ڈھاکہ کے شیر بنگلا کرکٹ اسٹیڈیم میں پاکستان اور بنگلادیش کے درمیان ٹیسٹ سیریز کا دوسرا میچ کھیلا جارہا ہے جس کے چوتھے دن کے کھیل میں ساجد خان نے بنگلادیشی کھلاڑیوں کے چھکے چھڑا دیے تھے۔

ساجد خان کی بہترین بولنگ کے باعث بنگلادیش کی پوری ٹیم صرف 87 رنز بناکر پویلین لوٹ گئی اور 14 رنز سے فالو آن کا شکار ہوگئی جبکہ دوسری اننگ میں بھی بنگلادیش کے 4 کھلاڑی 88 رنز پر آؤٹ ہوگئے ہیں۔

اننگ کی شکست سے بچنے کے لیے بنگلادیش کی ٹیم کو اب بھی 125 رنز درکار ہیں جبکہ 3 گھنٹے سے زائد کا کھیل باقی ہے، اگر پاکستان مزید 6 کھلاڑیوں کو آؤٹ کردیتا ہے تو میچ کے ساتھ ساتھ سیریز میں بھی فتح حاصل کرلے گا۔

واضح رہے کہ پاکستان اور بنگلادیش کے درمیان دو ٹیسٹ میچز کی سیریز کھیلی جارہی ہے جس میں پاکستان کو 1،0 کی برترتی حاصل ہے جبکہ یہ میچز آئی سی سی چیمپئنز ٹرافی کا حصہ ہیں۔