کراچی: پاک ویسٹ انڈیز سیریز کے اسکواڈ میں شامل کھلاڑیوں کی کووڈ رپورٹ منفی آگئی ہے۔

پی سی بی ترجمان کے مطابق پاکستانی ٹیم میں شامل کھلاڑیوں کی کووڈ رپورٹ منفی آگئی ہے جبکہ بائیو سیکیور ببل کو کل جوائن کرنے والے تمام کھلاڑی کی بھی کووڈ رپورٹ منفی آگئی ہے۔

ترجمان کے مطابق قومی ٹیم کے کھلاڑی آج ہوٹل میں آرام کریں گے اور پاکستانی ٹیم اپنی پریکٹس کا آغاز کل سے کرے گی جبکہ ویسٹ انڈیز اور پاکستان کے درمیان سیریز کا آغاز 13 دسمبر سے ہوگا جو 22 دسمبر تک جاری رہے گا۔

واضح رہے کہ گزشتہ روز ویسٹ انڈیز کے خلاف ون ڈے اسکواڈ میں شامل کھلاڑی کل کراچی پہنچے تھے جبکہ دیگر کھلاڑی آج ڈھاکہ سے لاہور پہنچ گئے ہیں۔

دوسری جانب ویسٹ انڈیز ٹی ٹوئنٹی اسکواڈ میں شامل کھلاڑی بھی گزشتہ روز دبئی کے راستے کراچی پہنچے تھے جنہیں سخت ترین سیکیورٹی میں ہوٹل منتقل کیا گیا تھا۔

یاد رہے کہ پولارڈ انجری کے سبب سیریز سے دستبردار ہوگئے ہیں جس کے بعد ان کی جگہ ٹی ٹوئنٹی میں ویسٹ انڈیز کی قیادت نکولس پوران کریں گے جبکہ ون ڈے میچز میں ویسٹ انڈیز کی کپتانی شائی ہوپ کو دی گئی ہے۔

ویسٹ انڈیز کے دورہ پاکستان کے دوران 3 ٹی ٹوئنٹی اور 3 ون ڈے میچز پر مشتمل سیریز کھیلی جائے گی۔

خٰال رہے کہ پاکستان اور ویسٹ انڈیز کے درمیان پہلا ٹی ٹوئنٹی میچ 13 دسمبر کو شام 6 بجے کھیلا جائے گا جبکہ دوسرا ٹی ٹوئنٹی 14 دسمبر کو ہوگا اور تیسرا اور آخری ٹی ٹوئنٹی میچ 16 دسمبر کو شام 6 بجے کھیلا جائے گا۔

اسی طرح پہلا ون ڈے میچ 18 دسمبر کو کھیلا جائے گا جبکہ دوسرا ون ڈے 20 دسمبر اور تیسرا ون ڈے انٹرنیشنل میچ 22 دسمبر کو کھیلا جائے گا۔