میلبرن: آسٹریلیا نے ایشز سیریز کا تیسرا ٹیسٹ بھی جیت کر سیریز اپنے نام کرلی ہے۔

آسٹریلیا نے تیسرا ٹیسٹ جیت کر ایشز برقرار رکھنا کے اعزاز حاصل کر لیا ہے جبکہ آسٹریلیا نے انگلینڈ کو تیسرے ٹیسٹ میں ایک اننگز اور 14 رنز سے شکست دی ہے۔ آسٹریلیا کو پانچ ٹیسٹ میچز کی سیریز میں تین صفر کی ناقابل شکست برتری حاصل ہے۔

تیسرے ٹیسٹ میں انگلینڈ نے پہلی اننگز میں 185 رنز بنائے جس کے جواب میں آسٹریلیا نے 267 رنز بنائے جبکہ انگلینڈ کی ٹیم دوسری اننگز میں صرف 68 رنز پر آؤٹ ہو گئی۔

پہلی اننگ میں کپتان جو روٹ نے 50 رنز بنائے اور دوسری اننگ میں بھی 28 رنز بناکر نمایاں رہے جبکہ انگلینڈ کے چار کھلاڑی صفر پر آؤٹ ہوگئے تھے۔

آسٹریلیا کی جانب سے دوسری اننگ میں ٹیسٹ ڈبیو کرنے والے فاسٹ بولر اسکاٹ بولینڈ نےچار اوورز میں سات رنز دے کر 6 وکٹیں حاصل کی جبکہ مچل اسٹارک 3 وکٹیں لینے میں کامیاب رہے اور کیمرون گرین نے ایک کھلاڑی کو آؤٹ کیا۔

واضح رہے کہ تیسرے ٹیسٹ میں آسٹریلیا نے ٹاس جیت کر انگلینڈ کو پہلے بیٹنگ کرنے کی دعوت دی تھی۔

آسٹریلیا کی پہلی اننگ

آسٹریلوی بیٹنگ لائن بھی پہلی اننگ میں کوئی خاطر خواہ کارکردگی نہ دکھاسکی تھی اور 267 رنز پر آل آؤٹ ہوگئی جبکہ آسٹریلیا کی جانب سے مارکس ہیرس 76 اور ڈیوڈ وارنر 38 رنز بناکر نمایاں رہے تھے۔

انگلینڈ کی جانب سے جیمز اینڈرسن نے 4، اولی روبنسن اور مارک ووڈ نے 2،2 جبکہ بین اسٹوکس اور جیک لیچ نے ایک ایک وکٹ حاصل کی تھی۔

خیال رہے کہ پہلے ٹیسٹ میچ میں آسٹریلیا نے 9 وکٹوں سے انگلینڈ کو شکست دی تھی جبکہ دوسرے ٹیسٹ میچ میں آسٹریلیا نے 275 رنز سے فتح حاصل کی تھی۔