ڈھاکہ: پاکستان اور بنگلادیش کے درمیان دوسرے ٹیسٹ میچ کا آج سے آغاز ہوگیا ہے۔

پاکستان اور بنگلادیش کی ٹیموں کے درمیان ٹیسٹ سیریز کے دوسرے میچ کا آغاز آج سے ڈھاکہ کے شیر بنگلا کرکٹ اسٹیڈیم میں ہوگیا ہے جبکہ اس میچ میں پاکستان نے ٹاس جیت کر پہلے بیٹنگ کا فیصلہ کیا ہے۔

پاکستان کی جانب سے اوپننگ کا آغاز عابد علی اور عبداللہ شفیق نے کیا اور 15 اوورز کے اختتام تک بغیر کوئی وکٹ گوائے پاکستان نے 54 رنز بنالیے ہیں جبکہ عابد علی نے 33 رنز اور عبداللہ شفیق نے 21 رنز بنالیے ہیں۔

پاکستان کے پیئنگ الیون میں کپتان بابر اعظم، نائب کپتان محمد رضوان، عابد علی، عبداللہ شفیق، اظہر علی، فواد عالم، فہیم اشرف، حسن علی، نعمان علی، ساجد خان اور شاہین شاہ آفریدی شامل ہیں۔

Pakistan win toss, elect to bat.#BANvPAK #HarHaalMainCricket pic.twitter.com/SGgwyvpTeW

— Pakistan Cricket (@TheRealPCB) December 4, 2021

واضح رہے کہ دوسرا ٹیسٹ میچ کھیلنے کے لیے قومی ٹیسٹ اسکواڈ یکم دسمبر کو چٹاگانگ سے ڈھاکہ پہنچا جس کے بعد 2 دن قومی اسکواڈ نے پریکٹس سیشن کیا۔

پاکستان اور بنگلادیش کے درمیان دو ٹیسٹ میچز پر مشتمل سیریز کھیلی جارہی ہے جس کا پہلا میچ جیت کر پاکستان کو سیریز میں 1،0 کی برترتی حاصل ہے جبکہ سیریز میں شامل دونوں ٹیسٹ میچز آئی سی سی ورلڈ ٹیسٹ چیمپئن شپ کا حصہ ہیں۔

یاد رہے کہ اس سے قبل کھیلے گئے پہلے ٹیسٹ میچ میں پاکستان نے بنگلادیش کو 8 وکٹوں سے شکست دی تھی  جس میں اوپنرز عابد علی اور عبداللہ شفیق نے بیٹنگ میں اہم کردار کیا تھا۔

بولنگ میں بھی پاکستانی بولرز چھائے رہے اور شاہین شاہ آفریدی، حسن علی نے بہترین گیند بازی کی جبکہ پہلے ٹیسٹ میچ کے بہترین کھلاڑی کا اعزاز عابد علی کے نام رہا جنہوں نے پہلی اننگ میں 133 اور دوسری اننگ میں 91 رنز اسکور کیے تھے۔

خیال رہے کہ پاکستان کے دورہ بنگلادیش کے دوران 3 ٹی ٹوئنٹی میچز پر مشتمل سیریز بھی کھیلی گئی جس میں پاکستان نے بنگلادیش کو کلین سوئپ کردیا تھا۔