کراچی: پاکستان اور ویسٹ انڈیز کے درمیان ٹی ٹوئنٹی سیریز کا پہلا میچ آج کھیلا جائے گا۔

کراچی کے نیشنل اسٹیڈیم میں آج پاکستان اور ویسٹ انڈیز کے درمیان ٹی ٹوئنٹی سیریز کا پہلا میچ کھیلا جائے جو پاکستانی وقت کے مطابق شام 6 بجے شروع ہوگا۔ اس میچ سے قبل دونوں ٹیموں نے 3 گھنٹے پریکٹس کی۔

یہ بھی پڑھیں: پاک ویسٹ انڈیز سیریز: قومی کھلاڑیوں کے کووڈ ٹیسٹ منفی آگئی

اس سے قبل ورچوئل پریس کانفرنس کرتے ہوئے قومی ٹیم کے کپتان بابر اعظم کا کہنا تھا کہ نیوزی لینڈ اور انگلینڈ کی سیریز ملتوی ہونے سے لگتا تھا کہ اب یہاں کوئی نہیں آئے گا لیکن ویسٹ انڈیز نے مشکل وقت میں ساتھ دیا۔

بابر اعظم کا کہنا تھا کہ ویسٹ انڈیز کو آسان حریف نہیں سمجھتے اور امید کرتے ہیں شائقین کرکٹ اسٹیڈیم کا رخ ضرور کریں گے۔

واضح رہے کہ کورونا وبا میں کمی کے بعد یہ پہلا موقع ہے جب شائقین کرکٹ کو مکمل گنجائش کے ساتھ اسٹیڈیم میں آنے کی اجازت دی گئی جبکہ گزشتہ رپورٹس کے مطابق پاک ویسٹ انڈیز سیریز میں شائقین کی عدم دلچسپی دیکھی گئی ہے اور دو دن قبل تک آدھے ٹکٹس بھی فروخت نہیں ہوئے تھے۔

یاد رہے کہ دونوں ٹیموں کے مابین 3 ٹی ٹوئنٹی اور 3 ون ڈے انٹرنیشنل میچز کھیلے جائیں گے جو کراچی میں ہی منعقد ہوں گے جبکہ دوسرا ٹی ٹوئنٹی میچ 14 دسمبر اور تیسرا 16 دسمبر کو کھیلا جائے گا۔

علاوہ ازیں پہلا ون ڈے 18 دسمبر، دوسرا 20 دسمبر اور تیسرا 22 دسمبر کو کھیلا جائے گا۔