ایشین چیمپئنز ٹرافی ہاکی میں بھارت نے پاکستان کو 1-3 سے شکست دے دی ۔

بنگلا دیشی دارالحکومت ڈھاکہ میں کھیلے گئے میچ میں بھارت نے شروع سے جارحانہ کھیل پیش کیا اور 13 ویں منٹ میں ہرمن پرت سنگھ نے پینالٹی کارنر پر گول کرکے اپنی ٹیم کو برتری حاصل کروادی۔

پہلے دو کوارٹرز میں پاکستان ٹیم کو دو دو منٹ کے مواقع ملے جب بھارتی ٹیم 10 کھلاڑیوں تک محدود ہوگئی تاہم قومی ٹیم دونوں مرتبہ ان مواقعوں سے فائدہ اٹھانے میں ناکام رہی۔

تیسرے کوارٹر میں پاکستان ٹیم بھی اس وقت دس کھلاڑیوں تک محدود ہوگئی  جب حماد الدین کو گرین کارڈ دکھاکر میدان سے باہر بھیج دیا گیا۔

بھارت نے ایک کھلاڑی کی کمی کا بھرپور فائدہ اٹھایا اور آکاش دیپ نے اپنی ٹیم کے لیے دوسرا گول کردیا ۔تاہم کوارٹر کے اختتام سے قبل پاکستان نے گول اسکور کرکے بھارت کی برتری کو کم کردیا۔

میچ کے اختتامی کوارٹر میں ہرمن پریت نے اپنا دوسرا گول اسکور کرکے بھارت  کو 1-3 کی برتری  دلوادی جو میچ کے اختتام تک برقرار رہی۔

ایشین چیمپئنز ٹرافی  کے مشترکہ دفاعی چیمپئن چھٹے ایڈیشن میں آج دوپہر مد مقابل آئے۔

ایشین چیمپئنز ٹرافی میں سب سے زیادہ بار چیمپئن ہونے کا اعزاز بھی پاکستان اور بھارت کے  پاس ہے۔دونوں ٹیمیں 3 بار ایشین چیمپئنز ٹرافی جیت چکی ہیں۔