قائد اعظم ٹرافی کے فائنل میچ میں شعیب ملک کے بھتیجے محمد حریرہ پر میچ فیس کا 20 فیصد جرمانہ عائد کردیا گیا ہے۔

پاکستان کرکٹ بورڈ(  پی سی بی ) کوڈ آف کنڈکٹ کی خلاف ورزی کرنے کے باعث ناردرن کے بیٹر محمد حریرہ پر میچ فیس کا 20 فیصد جرمانہ عائد کردیا گیا ہے۔

یہ واقعہ ناردرن اور خیبرپختونخوا  کے مابین  نیشنل اسٹیڈیم کراچی میں جاری قائد اعظم  ٹرافی  کے ڈے اینڈ نائٹ فائنل کے دوران  پیش آیا۔

محمد حریرہ  پی سی بی کوڈ آف کنڈکٹ کی شق  2.8 کی خلاف ورزی کے مرتکب پائے گئے۔یہ آرٹیکل میچ میں آؤٹ ہونے پر اپنے ایکشن کے ذریعے   غصہ اور غیر مناسب رویے کا اظہار کرنے سے متعلق ہے۔

یہ واقعہ  فائنل کےدوسرے روز ناردرن  کی پہلی اننگز کے 22ویں  اوورمیں اس وقت  پیش آیا جب  امپائر نے محمد حریرہ  کو  ایل بی ڈبلیو آؤٹ قرار دیا تاہم نوجوان بیٹر نے تاخیر سے کریز چھوڑی۔

بعد ازاں محمد حریرہ نے اپنی غلطی کو تسلیم کیا اور میچ ریفری ندیم ارشد کی طرف سے تجویز کردہ سزا کو قبول کیا ہے۔

جرمانہ آن فیلڈ امپائرز آصف یعقوب اور  فیصل خان آفریدی نے عائد کیا۔

واضح رہے کہ قائد اعظم ٹرافی کے فائنل میں ناردرن نے ٹاس جیت کر خیبر پختونخوا کو پہلے بیٹنگ کرنے کی دعوت دی تھی۔

خیبر پختونخوا نے افتخار احمد (102) کی سنچری جبکہ کامران غلام (72) اور آصف آفریدی(68) کی نصف سنچریز کی بدولت 374 رنز بنائے تھے۔

ناردرن کی جانب سے مبصر خان نے 4 ، وقاص احمد نے 3، محمد نواز نے 2 اور کاشف علی نے ایک وکٹ حاصل کی تھی۔

دوسرے دن کھیل کے اختتام تک ناردرن نے اپنی پہلی اننگز میں 3 وکٹوں کے نقصان پر 184 رنز بنالیے تھے۔سرمد بھٹی 39 اور فیضان ریاض ایک رن پر ناٹ آؤٹ ہیں۔

حیدر علی 81 اور محمد حریرہ 51  جبکہ کپتان عمر امین 4 رنز بناکر آؤٹ ہوئے۔

خیبر پختونخوا کی جانب سے ساجد خان نے 2 اور سمین گل نے ایک وکٹ حاصل کی۔

مسلسل بارش کے سبب آج تیسرے روز کا کھیل شروع ہی نہ ہوسکا۔کل کھیل اپنے مقررہ وقت پر شروع ہوگا جبکہ کھیل کا پانچواں روز بدھ کا ہی دن ہوگا ۔

Third day's play in the Quaid-e-Azam Trophy final washed out
More details:https://t.co/kXWhHMZ8Kc

— PCB Media (@TheRealPCBMedia) December 27, 2021